Шу локомотив пайдалану депосында тағы бір қазандық іске қосылды
«Теміржолсу-Шу» ЖШС – өзінің тікелей міндеттемелерінен бөлек қосымша қаржы көзін тауып жұмыскерлерінің әлеуетін тасытып отырған мекеме. Кәсіпорын өткен жылы Шу локомотив пайдалану депосының қазандығын толық жаңартып, көгілдір отынмен жұмыс істейтін қазандықты пайдалануға берген болатын. Онда заманауи құрылғылар орнатылды.
Міне, осындай ауқымды жұмысты іске асырған кәсіпорынға Жамбыл локомотив пайдалану депосы да тапсырыс беріп, жаңа жылдың қарсаңында депоның жаңа қазандығы іске қосылды. Бұл қазандық та газбен жұмыс істейді. Бір еркешелігі, газ болмай қалған жағдайда электр көзі мазутпен жұмыс істей береді. Оның барлығы автоматтандырылған.
– ЖТ-Жамбыл бөлімшесіне қарасты Жамбыл локомотив пайдалану депосындағы жаңа қазандық құрылысы мерзімінен бұрын аяқталып отыр. Жұмыс мамыр айында басталды, желтоқсанда аяқтап отырмыз. Негізі жұмыс 12 айда біту керек болатын. Екі бағыттағы құбыр 700 метрге тасталды. Жобаның құны – 74 381 000 теңге. Аталған қаржы толықтай игерілді. Тапсырыс беруші Жамбыл жүк тасымалы бөлімшесі. Ал Жамбыл учаскесінде 78 жұмысшы бар. Облыс орталығында 3 056 абономентке қызмет көрсетеміз. Негізінен Тараз қаласындағы Байзақ батыр көшесі бойындағы заңды және жеке тұлғалар қызмет алады. Ал негізгі абономенттер – темір жол желсінің арғы жағындағы тұрғындар. Онда бірнеше темір жол мекемелері де бар. Өткен жылы күзгі комиссиялық байқауда жақсы шығып, қысқа дайындығымызды да жоғары деңгейде пысықтадық. Қазір қысқы науқан жұмысы қалыпты өтуде. Алда көктемгі комиссиялық байқауға да дайындық бар. Сондай-ақ тарифке келетін болсақ, әу бастан біздегі тариф ең төменгі тариф болатын. Оған заңды және жеке тұлғалардан ешқандай талап болған емес. Өткен жылы санитарлық аймақтарды қоршауға 35 миллион теңге бөлінген болатын. «Теміржолсу-Шу» ЖШС қызмет көрсететін аумақта тоғыз нысанды қоршау керек болатын. Оның үшеуі облыс орталығында. Бұл жұмыстар да толық бітті, – дейді «Теміржолсу-Шу» ЖШС Жамбыл учаскесінің бөлімше бастығы Әбзелбек Тоқтарбаев.
Ерман Әбдиев, Жамбыл
Суретті түсірген автор