Жаппай қар тазалауға жұмылды

Семей теміржолшылары апта басында қармен күрес шараларына жұмылдырылды. Өңірде қардың айлық нормадан көп түсіп, қарлы боранның соғуына орай жол бойын қардан тазалау жұмыстары барлық станцияларда тәулік бойы жүргізілді. 

Қармен күрес науқандық шаралардың барлығы «ҚТЖ» ҰК» АҚ бас инженері Батыр Котыревтың №905 ЦЗ бұйрығы аясында жүзеге асырылуда. Тек магистральдық желі бөлімшесінен 300-ден аса теміржолшы қар тазарту жұмысына тартылды. Сонымен қатар, желі бойындағы станцияларда қозғалысшылар да күш жұмылдырып, қарлы боранның үздіксіз соғуына орай бағыттамалы бұрмалар жағдайына жауапты мамандар тәулік бойы кезекшілік жасады. 

Бөлімше бойынша 45 дана қар тазалау мен жол бойын қардан аршу техникалары пайдаланылуда.

– Қаңтар айының 23-не дейінгі көрсеткіш бойынша 2,5 мың км жол қардан аршылып, 10000 текше метр қар шығарылды. Әсіресе, бөлімше бойынша қар алып қалу қаупі жоғары телімдерде қауырт жұмыс жүргізілді. Қазір ахуал тұрақты, - дейді НЖС-6 жол бөлімінің бастығы Қайыргелді Ахметжанов.

Жолшылар мен станция қызметкерлерінің күш салуы нәтижесінде пойыздар қозғалысының кестесі бұзылған жоқ. Аймақтағы күрделі метеорологиялық ахуалға орай арнайы әзірленген жоспарлар аясында күнделікті тың шаралар қабылдануда. Шығыстық теміржолшылар келесі аптаға болжанған -30 градустық қатты аязға даярлық жасау үстінде.

Қуан Ертіс, Семей