Атырау теміржолшылары Жастар жылын қайырымдылық шарамен бастады
2019 жыл – Жастар жылы деп жариялануына орай Атырау жүк тасымалы бөлімшесіне қарасты Теңдік станциясының бір топ жастары жылды қайырылымдылықтан бастауды ұйғарды. Олар қаладағы Сәбилер үйіне барып, балаларға жаңа жылдық базарлық үлестірді. Станцияның қауіпсіздік және еңбек қорғау жетекші инженері Гауһар Бержанованың айтуынша, аталған мекемеде денсаулығында кәнәраты бар 4 жасқа дейінгі 30-ға тарта бала тәрбиеленеді. «Сондықтан да біз ата-анасының қамқорынан тыс қалған осы балаларға базарлық жасауды ұйғарып, станция жастарынан жиналған қаржыға ойыншықтар, жеке бас гигиеналық құралдары, жеміс-жидектер алып, еш баланы назардан тыс қалдырған жоқпыз. Қазақ деген жетімін жылатпаған халық, «жетім көрсең жебей жүр» деген қағидамен өмір сүреді. Сол ата-баба өсиетін орындап, жастар жылын балаларға қомқорлықпен бастадық. Сыйлықтар ата-ана жылуындай болмаса да, кішкене болса да қуаныш сыйлары анық» дейді олар.
Қосұйым Мұқашев, Атырау