Жас теміржолшының тың ұсынысы
Өндіріске инновациялық технологияны енгізу жолында жастар белсенділігі жоғары. Мәселен, «ҚТЖ» АҚ Ақтөбе жүк тасымалы филиалының жетекші инженері Эльвира Әбдіғалиева штрих кодты енгізу, мүгедектерге арналған вагонды іске қосу, жолсерікті шақыратын түйменің пайдасы туралы жоба дайындады.
Жалпы ақтөбелік жас теміржолшылар үнемі ізденісте жүреді. Олар өзіне жүктелген жұмысты атқарумен шектелмей, жаңалық енгізу, кейде теміржол саласын жетілдіруге қатысты ғылыми еңбектерді зерттейді. Эльвира Әбдіғалиева, мысалы, 8 жылдан бері тапжылмай еңбек етіп, сол уақытының бір бөлігін жаңа жобаларды ашып, қорғауға арнады. 29 жастағы маман алдағы Жастар форумында көпшіліктің назарына ұсыну үшін бірнеше жоба дайындап отыр. Ол жобалар теміржол саласының мүмкіндігі шектеулі жандарға қолжетімділігін арттырып, жолаушыларға сапалы қызмет көрсетуге бағытталған. Әрі теміржолшылардың жұмысын жеңілдетеді.
«Жастар форумы бізді ғылыми жұмыстарға қызықтырып, ынтамызды арттырады. Әр өңірдің, облыс орталығы ғана емес, аудан, ауыл жастары бірігіп, ортақ мәселелерді көтеріп, кедергілерді жою үшін жетілдіру жолдарын қарастырады. Талай ұсыныс ескеріліп, қолдау тауып та жатыр. Ал менің тың жобаларыма келсек, бірінші, мекемедегі негізгі бұйымдарға штрих код енгізу қажет. Бұл шаруашылық заттарға есеп жүргізу кезінде уақыт үнемдейді деп ойлаймын. Екінші, жолаушылар қызметінде сапаны арттыру үшін вагондарға «жолсерікті шақыру» қоңырауын орнату тиімді болар еді. Темір жол қызметін таңдаған жолаушылар вагон ішінде жолсерікті іздеп жүрмес үшін купелерге отырып, шақырту қоңырауын басады. Үшінші ұсыныс мүгедектерге арналған вагондарды әлі де жетілдіре түсу үшін қосымша құрылғылар орнатуға қатысты. Мен алдағы өтетін Жастар форумына осы жобаларымды ұсынатын боламын», – дейді Эльвира Әбдіғалиева.
Теміржолшылар отбасында тәрбие алып, сол саланың дамуы мен жандануына үлесін қосып жүрген жас маман 2011 жылдан теміржолдың есеп-қисап жағында еңбек етіп келеді. Бірақ жобалары өндіріспен байланысты. Бұл жас маманның қоғамға бейім, жан-жақты екенін көрсетеді. Әрі өзі жұмыс істеп отырған мекемесінің дамуына үлес қосуды мақсат етеді.
«Менің анам да, әкем де теміржолшы. Әжем де теміржол саласында еңбек етті. Сондықтан мамандығым экономист болса да сала жұмысы маған бес саусақтай таныс», – дейді Эльвира.
Ардақ Ерубаева, Ақтөбе