Қазыналы қарттарға құрмет
Елінің болашағы үшін еңбек етіп, жастарға бағыт-бағдар көрсетіп, үлгі-өнеге болған қазыналы қарияларымыз қай ұжымда болмасын көптеп саналады.
Жуырда Жамбыл магистральдық желі бөлімшесіне қарасты Шу белгі беру және байланыс дистанциясының бастығы Нұрлан Баялиевтің басшылығымен, мекеменің бір топ ардагерімен кездесу өтті. Шараға ұзақ жыл дистанцияға басшылық жасаған Саржан Балмұхамедов, Қартайған Аязбаев, саналы ғұмырын темір жолдың өркендеуіне арнаған ардагерлер Ербай Садықов, Құрман Жанболатов, Марат Әбирбаев, Мейірқұл Ақшабаев, Мият Беріков, Серік Тлепбергенов сынды майталман теміржолшылар арнайы шақырылды. Кездесу барысында мекеме басшысы дистанцияның бүгінгі тынысы, жеткен жетістіктері мен алған асулары, кейбір түйінді мәселелер туралы айтып, ел темір жолының бүгіні мен ертеңі туралы үлкендермен ой бөлісті. Оларға мекеменің дамуына қосқан қажырлы еңбектері мен жас ұрпақ тәрбиелеудегі ұлағатты істері үшін зор алғыс айтты.
Ардагерлер өз кезегінде, өткен өмір жолдарындағы қызықты естеліктерімен бөлісіп, елімізге тыныштық, бірлік тілей отырып, дистанция басшылығына ризашылықтарын білдірді.
Кеш соңында қонақтарға экономика ғылымдарының докторы Н.Қ.Есенғаринниң жалпы редакциясымен дайындалған белгі беру және байланыс дистанцияларының тарихы мен қалыптасуынан сыр шертетін «Қазақстан темір жолындағы автоматика, телемеханика және байланыстың дамуы» атты кітабы тарту етілді.
Ерман Әбдиев, Шу
Суретті түсірген автор