Шаңғы жолына шықты
Семейлік теміржолшылар қысқы табиғат аясында, саф таза ауада денсаулық күнін өткізді. Бұл күні барша сала мамандары қызметтік киімдерін спорттық формаға ауыстырып, шаңғы арқалап, Ертіс ортасындағы әсем аралдағы жаңадан ашылған спорт кешеніне келген болатын.
Семей ЖТ бөлімшесінің спорт нұсқаушылары ұйымдастырған, салауатты өмір салтын қалыптастыруды мақсат тұтқан осынау шара барысында теміржолшылар қауымы бірінші кезекте жылдағы дәстүрге сай президенттік тест тапсырды. Бұл күні бөлімшеге қарасты барлық мекемелер мен еншілес ұйымдар қызметкерлері мол жиналған болатын. Әдеттегіше ерлер екі шақырым, ал әйелдер қауымы бір шақырым қашықтықты шамамен 10 минут ішінде бағындырулары тиіс болатын. Кезектесіп шаңғы жолына шыққан теміржолшылар қауымы бұл үдеден табыла білді. Түрлі сайыстарға қатысып жүрген әуесқой жігіттер екі шақырымды небары 6 минут 4 секунд ішінде шаңғымен жүріп өтіп, жылдағы рекордты жаңартты.
«Локомотив» спорт клубының спорт нұсқаушысы Наталья Мешкованың айтуынша, президенттік тест тапсыруға ынта білдіргендер саны биыл жылдағыдан әлдеқайда көп болыпты. Сәйкесінше, шаңғымен уақытқа жүгірудегі көрсеткіш те жоғары.
Дегенмен шаңғының қызығы шара соңынан ұйымдастырылған қалалық біріншілік барысында тіптен арта түсті. Бұл байқауға қаладағы белді деген мекемелер мен еңбек ұжымдарының кіл жүйрік шаңғышылары қатысқан болатын. Семей ЖТ бөлімшесі бойынша да ұлттық компания жарыстарында топ жарып жүрген қыз-жігіттер іріктеліп шықты. Жанкүйерлердің қиқу салуымен сайыс барысы тіптен қыза түсті. Теміржолшылар намысын Зульфия Еникеева, Наталья Мешкова, Аманжол Аусыдықов сынды спортшылар қорғады. Осынау жарысқа арнайы даярлық өткізіп, шеберлік шыңдап жүрген әуесқой шаңғышылар жарады. Сайыстың нәтижесінде командалық есеп бойынша бас жүлде бірінші орынды ҚТЖ туын желбіреткен Семей ЖТ бөлімшесінің спортшылары жеңіп алды. Ал, екінші орынды осыған дейінгі сайыстарда теміржолшылардың алдын орап кетіп жүрген «Семей силикат зауыты» АҚ спортшылары алса, үшінші орынға күллі облысты электр қуатымен қамтып отырған «ШҚ АЭК» АҚ командасы тұрақтады.
Жеңімпаздарға арнайы түрде бағалы сыйлықтар мен мақтау грамоталары және жекелей құрмет қағаздары табыс етілді.
Қуаныш Қожаев, Семей