Ең үздік техникалық класс
Былтыр 1-30 қараша аралығында «ҚТЖ-Жүк тасымалы» АҚ филиалдары арасында өткен «Техникалық оқуға – ерекше назар» атты айлық қорытындысында Маңғыстау ЖТ бөлімшесі «Ең үздік техникалық класс» номинациясымен 1 орынды жеңіп алды.
Бұл туралы бөлімше директорының орынбасары Ерлан Бүркітов мәлімет беріп, аталған жетістік ұжымдағы техникалық мамандық иелерінің жемісті еңбегінің арқасы екенін айтты.
– Атап айтар болсам, бөлімшенің өндірістік-техникалық бөлімінің бастығы Ернар Айдарханов бастаған жас та болса бас болып жүрген қабілетті азаматтардың еңбегі зор. Сонымен қатар бұл жетістік Нұркен Қосымов, Жасұлан Нұрпейісов, Ербол Тілегенов, Рзабек Түрікпенбаев, Бектұр Исатаев сынды әріптестеріміздің еселі еңбегінің жемісі деп білемін. Олар техникалық класты тек безендіріп қана қоймай, филиалдың барлық тоқтаусыз жұмыс үдерісін ұйымдастыруға атсалысады. Сондықтан да болар темір жолда өндірістік-техникалық бөлімді кәсіпорынның «миы» деп атайды, – дейді Е. Бүркітов.
Аталған бөлім бастығы Е. Айдархановтың айтуынша, айлық шара аясында бірнеше номинация бойынша теміржолдағы оқу-техникалық саласына баға беріледі. Мәселен, осы «Ең үздік техникалық класс» номинациясынан өзге «Ең үздік оқыту шебері» және тағы да басқа аталымдарда марапаттар ұсынылады.
– «ҚТЖ-Жүк тасымалы» АҚ-ның өндірістік-техникалық даму департаментіне өзіміздің техникалық класымызды суретке түсіріп, барлық құжатымызды түгендеп салып жібердік. Сол бойынша олар басқа өңірлермен салыстыра отырып баға берді. Маңғыстау жол бөлімшесінің техникалық класында сала мамандарының толыққанды білім алуына барлық мүмкіндік жасалған. Мәселен, компьютер, телевизор, проектор, плакаттар, еңбек қорғау және қауіпсіздік тақырыбындағы қабырға стенділері, нормативтік құжаттар, суреттер, кітаптар және оқулықтармен толық қамтамасыз етілген, – дейді ол.
Нұрсая НҰРЛАНҚЫЗЫ
Суретті түсірген автор