Пара алу да, беру де қылмыс...
Атырау жүк тасымалы бөлімшесінде өңірдегі барлық темір жол құрылымдық бөлімше басшыларының және ҚР Мемлекеттік қызмет істері және сыбайлас жемқорлыққа қарсы іс-қимыл агенттігі департаменті, құқық қорғау саласы, «Нұр Отан» партиясы филиалы өкілдерінің қатысуымен жиын өтті.
Шараны жүргізген Атырау жүк тасымалы бөлімшесінің басшысы Мағауия Оразқұловтың айтуынша, «ҚТЖ-Жүк тасымалы» АҚ мен ҚР Сыбайлас жемқорлыққа қарсы агенттігі арасында Сыбайлас жемқорлыққа қарсы күрес бойынша ынтымақтастық туралы келісім жасақталған. Оның мақсаты – заң бұзушылыққа қарсы алдын алу және жүйелі шаралар кешенін әзірлеу, жүзеге асыру. Осы Келісім аясында АҚ-ның штатында Агенттік пен АҚ өкілдерінен жасақталған «Адал жол» жобалық кеңесі де құрылмақшы. Кеңес жұмысы темір жолмен жүк және жолаушы тасымалдау жұмысының дұрыс жүргізілуіне, көрсетілетін қызметтердің қолжетімділігіне, сыбайлас жемқорлықтың алдын алуға бағытталған.
ҚР Мемлекеттік қызмет істері және сыбайлас жемқорлыққа қарсы іс-қимыл агенттігі Атырау облысы бойынша департамент бастығы Тоқтамыс Жұмағұлов Агенттіктің жұмысы туралы түсінік беріп, бүгінде әлеуметтік мәселеге айналып отырған жемқорлықтың алдын алу қажеттігін айтты. «Бұл бүкіл әлем елдерінде бар үрдіс, өкінішке қарай, біздің ел де одан айналып кете алмады. Бірақ біздің мақсатымыз осы сыбайлас жемқорлық санын азайту, жою болып табылады. Жемқорлықтың ең кең тараған түрі – пара алу мен беру. Оған жеңіл қарауға болмайды. Бұған тәртіптік, әкімшілік және қылмыстық жаза қаралған. Бір қорап шоколад үшін істі болып жатқандар бар. Сондықтан сақ болыңыздар, жүрген жерлеріңізде, ұжымда осы мәселені мұқият айтыңыздар. Пара алушымен қатар беруші де қылмыс жасаушы болып саналады. Теміржолда да ондай жағдайлар кездесті» деді ол.
Темір жол саласындағы, соның ішінде Атырау бойынша оқиғаларды ҚР сыбайлас жемқорлыққа қарсы іс-қимыл Ұлттық бюросы Атырау облысы бойынша департаменті бастығының орынбасары Мұрат Данияров баяндады. Оның айтуынша, 2018 жылы Атырау облысы аумағындағы квазимемлекеттік сектордағы 13 лауазымды тұлға және қызметкерлермен орын алған сыбайлас жемқорлық қылмыстары әшкереленген. Онда пара алу, қызметтік өкілдігін асыра пайдалану, мемлекет мүлкін ысырап ету секілді қылмыстық құқықбұзушылықтар орын алған. Қазіргі уақытта қозғалған 13 қылмыстық істер бойынша 9 тұлғаға қатысты сот үкімі шықса, 2 тұлғаға қатысты сот процесі жалғасуда және 2 тұлғаға қатысты тергеу амалдары жүргізілуде екен. Осы аталған фактілермен қатар қатысушыларға сыбайлас жемқорлықпен ұсталғандар жөнінде деректі фильмдер көрсетілді. М.Данияровтың айтуынша, квазимемлекеттік саладағы лауазымды тұлғалардың сыбайлас жемқорлық құқықбұзушылықтарына жол беретін себептердің басым көпшілігі мемлекеттік сатып алу заңдылығын бұзу, кәсіпкерлік субьектісіне артықшылық беру арқылы өзінің пайдасына заңсыз сыйақы алу, қызметкерлерді жұмысқа қабылдау кезінде пара алу қылмыстары жиі кездеседі. Мұндай заңсыздықтарға жол берілмеуі тиіс. Агенттік өкілдерінің де баса айтқаны осы болды – құқықбұзушылыққа жол бермеу.
Атырау көлік прокурорының орынбасары Нұрлан Сәрсенов жүк тасымалдау мен қабылдаушылар қызметін автоманттандыру қажеттігін қаперге берді, оның ойынша, бұл да сыбайлас жемқорлыққа жол беруге итермелейтін жұмыс түрі. Жиынға қатысқан «Нұр Отан» партиясы Атырау облыстық филиалы жанындағы сыбайлас жемқорлыққа қарсы әрекет жөніндегі қылмыстық кеңес төрағасы Сайын Қуанышев та партия тарапынан үнемі қадағалау барын атап өтті.
Қосұйым Мұқашев, Атырау
Суретті түсірген автор