Жұмысшылардың жаны кіріп қалды

Атырау қаласынан шалғай жатқан Теңдік пен Қарабатан станцияларына қатынап жұмыс істейтіндер үшін жұмыс орнына жету және кешке кері қайту теміржолшылар үшін едәуір қиындық тудырып келген-ді. Жуырда бұл мәселе шешілді.  

Теңдік станциясы облыс орталығынан 10 шақырым, ал Қарабатан станциясы 30 шақырым қашықта жатыр. Оған Атыраудан қатынап жұмыс істейтін жұмысшыларды осыған дейін тозығы жеткен ескі, іші лас, орындықтары сынық, екі күннің бірінде бұзыла беретін жаман автобус тасымалдайтын. Соған орай, жұмысшылардың өтінішін ескерген Атырау жүк тасымалдау бөлімшесінің басшылығы биылдан бастап жаңа мердігермен келісім-шарт жасасып, енді теміржолшыларды жап-жаңа Газель автобустары тасымалдайтын болды.

Таңертең 8-ден кешкі 8-ге дейін жұмыс жасайтын екі станцияның ауысым жұмысшылары (Теңдік – 15, Қарабатан – 15 адам) жұмысқа уақытында барып, уақытылы шығатын болды. Автобус оларды Атырау вокзалынан таңертең, 6.45-те, кешке 18.45-те алып кетеді де, ауысымнан шаққандарын қалаға кейін алып қайтады. «Бұрын ескі автобуспен жұмысқа жеткенше жұмысшылар шаршап кетеміз дейтін, міне жаңа да жайлы көлікке отырып, жұмысшылардың жаны кіріп қалды» дейді Қарабатан станциясының бастығы М.Маймақов.

Қосұйым Мұқашев, Атырау