Ауыл: әйелдер патшалығы
Семей ЖТ бөлімшесі бойынша станция бастығы қызметін атқаратын нәзік жандылар баршылық. Әсіресе, Семей–Локоть телімі бойында әйел басшылар қызмет атқаратын бірқатар станцияларды айтуға болады. Соның ішінде Қазақстан-Ресей шекарасының дәл түбінде тұрған Ауыл станциясының бастығы Қарлығаш Райымханова туралы бүгін сөз қозғамақпыз.
Еліміздің қиыр шығысында, Локоть-Семей телімінің 561,1шақырымында орын тепкен, биыл іргесін көтергеніне 105 жыл толатын Ауыл станциясында кіл әйелдер қауымы жұмыс істейді. Атауы да айрықша Ауылдың бөлімшенің өзге жол айрықтары мен станцияларынан басты ерекшелігі сол. Ал, осы қызметке 2016 жылы тағайындалған Қарлығаш Мазанқызы – Аягөз өңірінің тумасы. Ең алғаш станцияға билет кассирі болып орналасыпты. Көп ұзамай тауар кассасында еңбек етуге көшеді. Станциядағы қызметі осылайша жалғастық тауып, мұндағы теміржол қызметінің барлық сатыларынан өтіпті. Басшылыққа осы станциядағы станция кезекшісі қызметінен ауысып келді. Қазіргі күні кіл қыз-келіншектер қауымынан тұратын үлкен ұжымның басшысы.
– Қызметкерлердің кіл әйелдерден тұруының жетістігі де бар, кемістігі де бар. Тиімділігі сол, әйелдің ұқыпты қолы станция жұмысын тап-тұйнақтай етеді, ал кемшілігі сол, қыстың күндері қар күреуге білек сыбанып өзіміз шығамыз. Әсіресе, ерлер қауымының жоқтығы 8 наурызда сезіледі. Сондықтан бір-бірімізді құттықтаудың жарқын үлгісі қалыптасқан, – дейді Қарлығаш Мазанқызы.
Аягөзден шалғайдағы осы станцияға жұбайымен келіп қоныстанғалы талай жыл, сондықтан ауыл Қарлығаш үшін кір жуып, кіндік кескен жерінен еш кем емес. Жолдасы Руслан жолшы, ал қызы Манар станция кезекшісі, қысқасы, бәрінің илегені бір терінің пұшпағы.
– Ауыл станциясының жұмысы жеңіл емес. Шекаралық аймақ болғандықтан төлқұжат режимі бар. Тәртіп қатаң. Жолаушылар пойызы 1,5 сағат аял жасап, толық тексерілуден өтеді. Жүк пойыздары да қатаң күзетіледі. Іргелес аграрлы аудандардың шаруалары астықтарын бізге сеніп тапсырады. Жүк тиеу ауқымы жыл сайын артуда. Тек әйелдер еңбек ететін ұжым болсақ та осы кезеңге дейін бірде-бір рет сөгіс алып көрген жоқпыз, ақау да орын алмады, – дейді Қарлығаш.
Әріптестері әзілдеп «әйелдер патшалығы» деп атайтын Ауылдың ұжымы 8 наурыз төл мерекелерін жылдағы дағдыға сай «Ақжол» дәмханасында атап өтуге той көйлектерін дайындауда. Бір мезгіл формаларын шешіп, қызыл-жасыл көйлек киіп, алқа-білезіктерін тағып, опа-далаптарын жағып... дегендей, өздерін бір сәт әлсіз де әдемі әйел сезінуді қай нәзік жан қаламас дейсіз...
Қуаныш Қожаев, Семей