Әуесқой балықшылар жарысы

Жуырда шығыстағы Шүлбі су қоймасына қарасты Қызылсу өзенінде мән-мағынасы ерекше сайыс – балықшылар жарысы өтті. Күллі облыс көлеміндегі әуесқой балықшылар қатысатын аталмыш байқауға Семей ЖТ бөлімшесінің теміржолшылары да қатысып, бақ сынады. 

Бұл жолғы облыстық чемпионатқа әр қала, әр ауданнан жиналған жалпы саны 22 команда қатысып, өзара шеберлік сынасты. Ойынның шарты сол, мұз астынан балық аулау,шыдамдылық таныту, аз уақыт ішінде мол өнім жинау болатын.

Аталмыш сайысқа теміржолшылар қауымын команда капитаны, Жаңа-Семей жол дистанциясының бастығы Мұрат Мамырбаев бастап барды. «Балықшы балықшыны алыстан таниды» демекші, балық аулау хоббиына айналған жігіттер бірін бірі білетін болып тұр ғой, аймақтың әр түкпірінен жиналған балықшылар теміржолшылар командасын құрып жіберді.

– Мұз астынан балық аулау үлкен төзімділікті талап етеді. Сол себептен табиғат аясында демалудың бұл түрі де спортқа жатқызылады, әзірше мұз ерімей тұрып өткізіліп жатқан ерекше сайысқа қатысып бағын сынаушылар қатары көп болғаны өңірде балық аулау хоббиіне айналғандар мол екені білдіреді, – дейді Мұрат Мамырбаев.

Аталмыш облыстық чемпионат барысында теміржолшылар тарапынан сынға түскен Мейрамғазы Абдельдинов, Жұмабек Әлімбеков, Асқар Найманбаев, Саят Мұсағазинов сынды әуесқой балықшылар шеберлігіне көпшілік тәнті болды. Бірінің қармағын тек ірі көлемді сазан балықтар қапса, енді бірі кіл майшабақтан бірнеше килограмм жинады. Соның нәтижесінде теміржолшылар қауымы 22 команда арасында жүлделі 4-ші орынды жеңіп алды. Жалпы, «Ең ірі балық аулаушы», «Ең алғаш қармағын балық қапқан балықшы», т.б. аталымдар бойынша арнайы жүлделер табыс етілді. Бұл ретте осынау облыстық чемпионатқа тұңғыш рет қатысқан ПЧ-40 мекемесінің механигі Асқар Найманбаев «Биатлон» номинациясы бойынша жүлделі бірінші орынды жеңіп алды.