Атырауда тексеру жұмыстары әдеттегіден ерте басталды
Атырау жүк тасымалы бөлімшесінде көктемгі комиссиялық тексеру жұмыстары биыл әдеттегіден ерте басталды. 31 наурызда басталған байқау 16 сәуірге дейін жалғаспақ.
Тексеріс барысында қозғалыс қауіпсіздігі, еңбек қорғау және қауіпсіздік техникасы, техникалық құралдардың, ғимараттардың жай-күйі, байланыс, электр құралдарының, вагондардың жағдайы, темір жолдың қазіргі күйі, сондай-ақ теміршолшылардың білім-біліктілігі, жеке мәселелелері де қаралады. «Комиссия мамандарымен қамтылған тексеріс арнайы локомотив арқылы жүзеге асырылмақ. Ең әуелі Ганюшкино-Д.Нұрпейсова телімі бойынша басталып, Ганюшкино-Исатай, Исатай-Қызылжар телімдері, сонан кейін Махамбет, Атырау, Теңдік, Ақжайық, 496-402 разъезд аралығы, Мақат-Құлсары, Сағыз-Мақат телімдері, телімдердегі жол, сигнализация, энергиямен қамту дистанциялары, вагон, локомотив деполары, т.б. қаралады. Сол жерлерде талқылау жұмыстары да жүргізіледі», – дейді Атырау жүк тасымалы бөлімшесінің бас инженері Б.Картан.
2018 жыл қорытындысымен аймақта пойыз және маневрлік жұмыстарда өндірістік жарақат алу болмаған. Бөлімшеде пайдаланым көрсеткіштерін орындау бойынша да нәтижелер жақсы деңгейде. Бұған дейін құрылымдық бөлімшелердің өз ішінде көктемгі тексеруге дайындық деңгейі, пойыздық және маневрлік жұмыстарда ақау, өндірістік жарақат алу жағдайы, қозғалыс қауіпсіздігі, еңбек қорғау және қауіпсіздік техникасы, техниикалық құралдардың жағдайы, ғимараттардың абаттандырылуы, жұмысшылардың тәртібі қаралған-ды. Ол тексерулерде байқалғаны, кейбір бұрмалар, шпалдар желінген, рельс шынжырлары, аккумулятор қондырғылары, белгі беру құралдарын қанша күтіп ұстауға тырысқанмен, тозып қалатыны байқалады. Негізінен электр желілерін, бағыттамалы бұрмаларды сыртқы тексеру, рельс шынжырларының оқшаулану элементтерін тексеру және жөндеу бағытында кемшіліктер бар. Станцияларда вагон қараушылардың, пойыз құрастырушылардың, басқа да жұмысшылардың жұмыс жасауына жарықтың, прожекторлардың болмауы немесе әлсіздігі әсер етеді. Міне, осы және басқа да жұмыстарды арнайы комиссия жарты ай тескеріп, сәуір айының соңында жалпы қорытынды жиналыс өтпек.
Қосұйым Мұқашев, Атырау