Маңғыстауда көктемгі комиссиялық байқау Болашақ станциясынан басталды
Маңғыстау жүк тасымалы бөлімшесінде көктемгі комиссиялық байқау 3 сәуірде бөлімше шекарасындағы Болашақ станциясынан басталды.
Ұлттық компания мен оның еншілес ұйымдарының филиалдары бойынша барлық шаруашылықтарына тексеру жүргізетін комиссия құрамы да бекітілді. Бөлімше директорының орынбасары Ерлан Бүркітовтің айтуынша, биыл тексеруді магистральдық желі бөлімшесімен қауіпсіздік ревизорларының қатысуымен бөлімше директорының бірінші орынбасарының төрағалығымен өткізу жоспарлануда.
– Дәстүрлі байқау барысында жол мен жасанды құрылыстар, ғимараттар жағдайы, магистральдық инфрақұрылымның өзге де нысандарының, темір жол өткелдерінің жай-күйі мен өрт қауіпсіздігі жағдайы, габариттік нормаға сай болуы тексерілмек. Бұдан бөлек тауарлық-материалдық құндылықтардың қоймаларда сақталуы, өрт күзет дабылдарының жұмысы, су және жылумен қамту нысандарының техникалық жағдайы, кәсіпорындардың материалдармен, қосалқы бөлшектермен, жабдықтармен, жанаржағар маймен қамтамасыз етілуі қаралмақ. Жылжымалы құрамдардың ағымдағы жағдайы мен күтімі де назардан тыс қалмақ емес, – дейді Ерлан Бүркітов.
Оның айтуынша, байқау барысында еңбек қорғау және техника қауіпсіздігі, өндірістік жарақат алушылыққа жол бермеу, сырқаттанудың алдын алу мәселелеріне, техникалық оқытуды ұйымдастырушылардың жұмысшыларды кәсіби дайындау деңгейіне айрықша басымдық берілмек.
Темір жолдағы қызмет ережелерінің сақталуы мен оны еңбеккерлердің білуі де ескерілмек. Міне, осындай қатаң тәртіпті талап етуге құрылған байқау комиссиясы алдымен мемлекетаралық шекаралық түйісу нүктесі Болашаққа табан тіреді. Мұнда олар барлық темір жол инфрақұрылымы нысандарын аралап шықты. Атап айтқанда, жол дистанциясының желілік-өндірістік телімдері, байланыс және сигнализация саласы, су айдайтын станциясы, қазандық, вагон депосының техникалық қызмет көрсету қосыны, вокзал, локомотив бригадасының демалыс үйі, электрмен жабдықтау дистанциясының шеберханасы, СЦБ релелік ғимараты, байланыс және сигнализация дистанциясының желілік аппарат залы, электрлік орталықтандыру қосыны, әкімшілік-тұрмыстық корпусы қаралды. Байқау комиссиясы мұнайлы түбектің 72 станция бекетін араламақ.
Ұлан ОРАЗ