Қызылордада машинистер жағдайымен танысты
Қызылорда ЖТ бөлімшесіне қарасты Қызылорда локомотив пайдалану депосында еңбек ететін 800ден астам теміржолшының 73 пайызын машинистер мен олардың көмекшілері құрайды.
Осы локомотившілердің, әсіресе күн-түн қатып жолда жүретін локомотив бригадаларының хал-ахуалымен танысқан билік партиясының «Теміржол» филиалы төрағасының бірінші орынбасары Базара Танбаева кездесу барысында бірінші кезекте әртүрлі жағдайда өндірістік жарақат алып, мүгедектікке шықса да жұмысын жалғастырып отырған мүмкіндігі шектеулі тұлғалардың әлеуметтік қорғалуларын (депо бойынша жеті адам) көріп, оларға кедергісіз орта үшін қандай қажетті жағдайлар жасалуын тапсырды. Одан әрі депода жұмыс жасайтындардың дені машинистер болғасын, осы маман иелерінің ішінен көп балалы отбасыларды қолдау жайы, сонымен қатар мұқтаж отбасылар мен қауіп қатерге тап болған жандарға депо басшылықтары, кәсіподақ тарапынан әлеуметтік көмектердің берілу жайы да назардан тыс қалмады. Машинистердің кезекті сапарға шыққанда пайдаланатын асхана бөлмесінің жағдайымен танысты. Кезекті сапардан келген машинистермен кездесіп, елдегі саяси өзгерістер мен партияның жаңа бағдарламасын жүзеге асыру барысы туралы, төрт әлеуметтік жоба бойынша ойларымен бөлісті. Кездесу соңында теміржолшыларда өздерін толғандырған мәселелер төңірегінде сауалдарына жауап алды.
«Бүгін партия өкілдері келіп жұмыс жағдайымызбен танысып, партия съезінде берілген , әл-аухаты төмен отбасыларды қолдау туралы тапсырмаларға түсіндірме жұмыстарын жүргізіп жатыр. Өзімнен бастап депода әр түрлі топ мүгедектігімен жұмыс жасап жүрген жеті әріптесіме депо басшылығы тарапынан барлық жағдайлар жасалған. Осы локомотив депосында 42 жылдан астам жұмыс жасаймын. Жұмыс барысында өндірістік жарақат алып, 2-ші топ мүгедекке шыққаннан кейін түрлі жоспарлаушы,шақырушы қызметтерін атқарып келдім, қазіргі таңда локомотив бригадаларының резер бастығы қызметін атқарамын. Тағдырдың жазумен жетім қалған, бір ата-анадан туылған 6 баланы өз балаларымен қосып тәрбиелеп отырған жайым да бар», – дейді Болат Қалмаханов.
Азамат ҚҰЛЫМБЕТ