Алты жолмен шектескен Ақтөбе жүк тасымалы бөлімшесі
Ақтөбе жүк тасымалы бөлімшесі алты бірдей теміржол бөлімшесімен түйіседі екен. Әлімбет станциясы арқылы Ресей федерациясының Оңтүстік Орал темір жолымен шектессе, Сағыз станциясы арқылы Атырау бөлімшесімен, Сексеуіл станциясы арқылы Қызылорда бөлімшесімен, Әйтеке би станциясы арқылы Қостанай бөлімшесімен, Жайсаң станциясы арқылы Орал бөлімшесімен және Тассай станциясы арқылы Маңғыстау бөлімшесімен шектеседі.
Ақтөбе темір жолы құрылымы жағынан ең үлкен бөлімше, ірілі-ұсақты 96 бөлу пункті бар. Бөлімшеде 11 диспетчерлік айналым жұмыс жасайды. Ондағы мамандардың 80-90 пайызы жастар. Бөлімшедегі бүкіл қозғалыстың жүрегі саналатын жедел реттестіру бөлімі станцияға келген жүк пойыздары мен жолаушы пойыздарын үйлестіріп отырады. Тиелген жүктерді қабылдап, пойыздарды құрастыру жұмыстары жүргізіледі. Бөлімше биылғы жылдың 3 айын жоспарға сай қорытындылап отыр. Жүк айналымы көрсеткіші 100 пайыздан асып, тасымал көлемі артқан. Соңғы кезде әсіресе, «Нұрлы жол» бағдарламасы арқылы Бершүгір, Мұғалжар, Кемпірсай станцияларынан қиыршық тас тиелімі артып отыр екен. Еліміздің Батыс өңіріне күніне жүздеген вагондар жөнелтілуде.
«Жыл жақсы көрсеткішпен басталды. Жүк айналымы жоспар бойынша 101 пайызды құрап, 4 млрд 644 млн ткм жүк жоспардан артық тасымалданды. Жүк тиеу жоспар бойынша 100,6 пайызбен тәулігіне 3 млн 919,8 мың вагон жүк артығымен тиелді. Динамикалық жүктеме орындалған жоспар 103,7 пайыз. Статистикалық жүктемеде жоспар 100,3 пайызға жетіп отыр. Жүк түсіру тәулігіне 275 вагонды құрады. Вагон айналымы жоспар бойынша 100 пайызға жетіп, вагонның орташа айналымы 2,12 тәулікті құрап отыр. Жүк вагонының тәулігіне орташа өнімділігі 104,5 пайызға жетіп отыр. Локомотивтің тәулігіне орташа өнімділігі 2130 мың тонна км, ал пойыздың орташа салмағы 102 пайызбен тәулігіне 3241 тоннаны құрап отыр. Бүгінгі таңда 50 жүк пойызы қабылданып, 50 жүк пойызы тапсырылуда», – дейді Ақтөбе ЖТ бөлімшесі жедел реттестіру бөлімі басшысының орынбасары Әділет Матеуов.
Бөлімше қозғалыс қауіпсіздігін қамтамасыз етуден де алда. Жұмыс орындары түгелдей аттестацияланып, жұмысшыларға қолайлы жағдай жасалған. Цифрлы Қазақстан бағдарламасы аясында АСУ ДКР, АСУ ЭДТ сынды озық бағдарламалар енгізіліп, бөлімше жұмысының тиімділігін арттыруда екен. Өткен жылы бөлімше бойынша 56 км жол күрделі жөндеуден өтсе, биылғы жылға 24 км жол күрделі жөндеуден өткізу жоспарланып отырған көрінеді.