Түркістан станциясының вокзалы - көненің көзі

Шымкент магистральдық желі бөлімшесіне қарасты Түркістан станциясының вокзалы – 1904 жылы салынған көненің көзі. Түркітілдес халықтың рухани астанасы саналатын ескі шаһар енді облыс орталығына айналуымен вокзал тіршілігі қайнай түсті. 

Сондықтан көрнекті тарихи ескерткіштерге бай шаһарда келім-кетім жолаушы да көбейіп, Киелі Түркістанды тамашалауға келгендер тек қана Қожа Ахмет Яссауидің ғана емес, ғасырдан астам тарихы бар вокзал ғимаратын да тамашалары сөзсіз. 

Вокзалдың ғимараты Орынбор-Ташкент теміржолының оңтүстік бөлігі ретінде салынған. Вокзалдың жалпы алаңы – 26175 шаршы метр, ал вокзал ғимараты 876,4 шаршы метрді құрайды. Бүгінде тәулік 21-23 жұп пойыз өтетін Түркістан вокзалында 33 қызметкер жұмыс істейді. Өткен ғасырдың ортасында күрделі жөндеуден өткенімен, вокзалдың ішкі сәулеті, есіктің тұтқалары, аң бейнесіндегі бастың суреттері, қабырғадағы жазулар, қола шамдар мен ілулі вестибюльдер әлі күнге келушілердің назарын аудармай қоймайды. 

Көне шаһардың қақпасы бүгінгі таңда көктемгі комиссиялық байқауды өткізіп, алдағы жазғы жолаушы тасымалына сақадай сай әзірлікпен келіп отыр. 

Жансая СЫДЫҚБАЙ