Қызылорда теміржолшылары бұрынғы әріптестеріне барды
Қызылорда магистральдық желі бөлімшесінің бас инженері Берік Бекжанов пен еңбек қорғау және экология бөлімінің басшысы Ержан Нұрмашұлы бастаған топ еңбек қорғау күніне орай бұрынғы әріптестері Мұса Шәкиұлы Бегалиевтің отбасында болып, оның хал-ахуалымен танысып қайтты.
Адам баласының бейқамдығынан немесе жұмыс орнындағы жазатайым жағдайлардан түрлі келеңсіз жағдайға тап болуы – аса қауіпті аймақ саналатын теміржол саласында сирек болса да кездесетін жайт.
Пойыз құрастырушы болып жұмыс жасап жүріп 2011 жылы жазатайым оқиғаға ұшырап, екі аяғынан айрылған Мұса Шәкиұлы Бегалиевті әріптестері тағдырдың тезіне жалғыз қалдырмай, үнемі жанынан табылып, қолдау көрсетіп келеді. Өткен жылы Ұлттық компания тарапынан жасалатын көмек аясында оған автокөлік алып берген болатын. Биыл да Мұсаны еңбек қорғау күні құттықтай барған әріптестері оның көңілін аулап, жанынан табылды.
Мұса Бегалиев «ҚТЖ» ҰК» АҚ мен бөлімше тарапынан берілуі тиіс көмектің бәрін алып келеді. Оның жыл сайынғы ем-домға қажетті қаржысы, әлеуметтік қолдау шаралары уақытылы өтелуде екен. Өзінің басына түскен ауыртпалықты бөлісіп, жанынан табылған әріптестеріне разылығын білдірген Мұса Шәкиұлы, қазіргі таңда жұмыста жүрген әріптестерінің мұндай бақытсыздыққа ұшырамауын тілейтінін жеткізді. Бес баланың сүйікті әкесі Мұсаның Қуаныш есімді ұлы әке жолын жалғастырып, Белкөл станциясында парк кезекшісі болып еңбектеніп жүр екен.
– Мұса Шәкиұлының басқаруына берілген автокөлік үшін ай сайын АИ-92 маркалы 75 литр бензин, дәрідәрмек алу үшін Ұлттық «ҚТЖ» ҰК» компаниясының ұжымдық шартына сәйкес қажетті әлеуметтік көмек беріліп тұрады, оның жағдайын үнемі назарда ұстап отырамыз, – деді бөлімшенің еңбек қорғау және экология бөлімінің басшысы Ержан Нұрмашұлы.
Сабырхан СЕЙІЛБЕКҰЛЫ