Еңбек ескерілуі тиіс
Дүниежүзілік еңбекті қорғау күнін Жамбыл магистральдық желі бөлімшесіне қарасты белгі беру және байланыс дистанциясы жылдағыдай дәстүрлі түрде атап өтті. Дистанцияда өткен жиынға мекемеге қарасты барлық құрылымдар өкілдері қатысты.
Жиын өндірісте қайтыс болған теміржолшыларды бір минуттық үнсіздікпен еске алудан басталды. Осыдан кейін дистанцияның бас инженері Нұрғали Терлікбаев еңбек қорғау мен қауіпсіздік ережелерінің ерекшеліктері және дистанциядағы оқыс оқиғалардың себепсалдарлары жайлы баяндама жасады.
– Дистанция жұмысшылары өздерінің қызметтік міндетін орындау кезіндегі құқықтары мен төнетін қауіп-қатерден жеткілікті хабардар болуы керек. Ал басшылықтың міндеті – сол қауіп-қатерді жұмысшылардың қаперіне жеткізіп, жарақат алу жағдайларынан барынша сақтандырып отыруы тиіс. Сондықтан өндіріс барысындағы қауіпсіздік Ережелерін сақтау – басшылықтың ұжым қызметкерлеріне қоятын басты талабы болып қала бермек. Дегенмен, жұмыста мұқияттылыққа немқұрайлы қарамау, еңбек қауіпсіздігін қамтамасыз ету сынды міндеттерді бірлесе еңсергенде ғана нәтижелі жетістікке жетеміз, – дейді Н.Терлікбаев.
Еңбек қорғау күні аясында көктемгі байқау шараларының қорытындысы бойынша дистанцияның үздік құрылымы мен жұмысшылары ақшалай көтерме сыйақымен марапатталды.
Атап айтсақ, Жаңатас станциясына қарасты аға электромеханик Серік Кесебаев жетекшілік ететін №28 цех үздік құрылым аталып, бірінші орынды жеңіп алса, Қорағаты станциясының аға электромеханик Елубай Есенов басшылық ететін №21 цехы екінші орынға лайық деп танылды. Үшінші орын – Бүгін станциясының №12 цехы, жетекшісі – аға электромеханик Қуат Саудақұлов.
Сондай-ақ, еңбекті қорғау бойынша аға техникалық инспектор Әсет Асранқұлов, техникалық инспектор Айгүл Керімбекова, техникалық инспектор Ержан Доғалақов сынды бірқатар жұмысшылар үздік техникалық инспектор аталымы бойынша марапатталып, бағалы әрі ақшалай сыйақыға ие болды.
Жылда бұл күнді ұмыт қалдырмай, жұмыс кезінде мерт болған әріптестерін еске алуды өз парыздарындай көретін дистанция ұжымы қызмет бабында қайтыс болған және жарақат алып мүгедек болып қалған теміржолшылардың үйіне барып, отбасымен жүздесіп, азық-түлік түріндегі материалдық көмек көрсету шараларын да ұмыт қалдырмады.