Қосымша шығындар орын алған

Бюджетті үнемдеу, бөлінген қаржыны тиімді пайдалану – әрбір мекеменің басты міндеті. Бұл орайда Шымкент белгі беру және байланыс шаруашылығы бойынша бюджеттің орындалуында өткен жылы басы артық шығындар орын алған.

Жалпы, дистанцияға бюджеттен 810 593 мың теңге сомасында қаржы бөлініп, оның іс жүзінде 797 823 мың теңгесі игерілді, яғни 98,4%. Игерілмеген қаржы 12 770 мың теңгені құрады.

Әлеуметтік салаға 40 317 мың теңге бөлінген, оның іс жүзінде 43 880 мың теңгесі игерілді. Яғни, бөлінген қаржының үстінен қосымша 3 563 мың теңге ақша жұмсалған. Дистанцияға қажетті материалдарға 87 523 мың теңге бөлініпті. Бұған кеткен шығын 101 553 мың теңге, мұнда да қосымша артық 14 030 мың теңге қажеттілікке жұмсалды. Ал жанар-жағармайға 8 417 мың теңге бөлінді, кеткен шығын 7 334 мың теңгені құрады. Игерілмей қалған қаржы – 1 083 мың теңге, себебі ЦЖС-тің техникалық бюджетінің жоспарына сәйкес келмеген. Электр энергиясына бюджеттен 36 890 мың теңге бөлінсе, оның игерілгені – 34 452 мың теңге. Игерілмей қалған 2 438 мың теңге ЦШ техникалық бөлімінің экономика және жоспарлау департаменті жоспарының көлеміне сәйкес болмай шыққан. Жұмыс төлемақысы және өзге ұйымдардың қызмет көрсетуіне бюджеттен 117 513 мың теңге бөлінген. Оның шығыны 11 913 мың теңгені құраса, игерілмеген сома – 105 600 мың теңгеге жеткен.

Дистанция техникалық бөлімінің жетекші инженері Гүлнар Тұрғанбаеваның мәліметіне сүйенсек, тағы басқа қажеттіліктерге бюджеттен 30 220 мың теңге бөлініп, шығын 31 610 мың теңгені құраған. Қосымша кеткен шығын – 1390 мың теңге. Бұл шығындар атап айтқанда, кадрлар дайындау, біліктілікті жоғарылату, медициналық сақтандыру, медициналық тексеруден өтудің барлық түріне, тағы басқа қажеттіліктер үшін жұмсалған.