Бейнеу станцияның вагон қараушысы қырағылық танытты
Темір жолда вагондарға техникалық қызмет көрсетіп, кем-кетігін анықтайтын вагоншылардың жұмысы қауіпсіздік саласында аса зор маңызға ие. Сондай қырағы вагон қараушылар Бейнеуде де көп.
Жыл басынан бергі ақауларды айтпағанда, осы жылдың 1 сәуірінде осы станцияның вагон қараушысы Жүсіп Орынбаев Бурундай станциясынан Ақтау портына бет алған жүк пойызының вагонынан полемидті сепаратор сынығы ақауын тапты. Мұндай күрделі ақауларды бұған дейін де бірнеше рет анықтаған Жүсіптің теміржолдағы еңбек өтілі бар болғаны 4 жыл. Өз жүрек қалауымен теміржол саласына колледжге оқуға түсіп, алғашқы еңбек жолын 2015 жылы БейнеуЖезқазған жаңа темір жол телімінде ашылған Алтай станциясында белгі беруші болып бастаған. 2 жылдан бері ол вагон шаруашылығына ауысып, Бейнеуде вагон қараушы болып еңбек етуде.
– Бүгінде 5-ші разрядты вагон қараушымын. Бейнеу ТҚКҚ-на қарасты вагоншылар бір ауысымда 15 адамдай болып жұмысқа шығамыз. Тоғыз жолдың торабы Бейнеу өте ауқымды станцияға айналды, әр ауысымда шамамен 10-15 пойызға техникалық қызмет көрсетеміз, – дейді вагоншы.
Тапқан ақауы дәлелденіп, сыйақыға ұсынылған вагоншы өз әріптестерінің еңбегін жоғары бағалайтынын жеткізді. Қауіпсіз қозғалысты қалтқысыз сақтау – ең бірінші міндетім деп санайтын теміржолшы өз мамандығын жақсы меңгерген сайын оған деген қызығушылығы мен құлшынысы арта түскенін жасырмайды.
Ұлан ОРАЗ