Маңғыстау теміржолшыларға бірқатар тапсырмалар берілді
Маңғыстау теміржолында биыл 26 наурыз бен 8 мамыр аралығында өткен көктемгі комиссиялық байқау қорытындыланды.
Байқау нәтижелері Маңғыстау ЖТ бөлімшесі ғимаратында бөлімше директоры Нәжімеден Ғұбашев, магистральдық желі бөлімшесінің директоры Мұхтар Бақтыгереев, бөлімшенің бас ревизоры Болат Дүйсәлиевтің қатысуымен өткен арнайы жиын барысында жария етілді.
Байқау барысында нысандар, ғимараттар мен имараттар, жылжымалы құрам, техникалық құралдар мен құрылғылар тексеруге алынған. Бұл ауқымды жұмысқа аймақтық және желілік деңгейдегі кәсіпорындардың барлық 5,5 мың адамнан тұратын еңбек ұжымы жұмылдырылды. Қорытынды жиында құрылымдық бөлімшелер басшыларының анықталған кемшіліктер бойынша қабылдаған шаралары туралы мәліметтер тыңдалды. Биыл көктемгі тексеру кезінде 718 бұзушылық анықталыпты, бұл былтырғыға қарағанда 518 кемшілікке аз. Өйткені өткен жылы көктемгі байқауда барлығы 1236 кемшілік табылған екен.
Биылғы анықталған кемшіліктердің ең көбі ШЧ-10 мекемесіне тиесілі, мұнда 107 бұзушылық тіркелген. Одан кейін ПЧ-12, ВЧД-33, ДС, ТЧЭ-6 мекемелері орын алып отыр. Жедел талдау нәтижесінде кемшіліктерді жою бойынша, сонымен қатар пойыздар қозғалысы қауіпсіздігін қамтамасыз ету деңгейін арттыруға қатысты бірқатар нақты тапсырмалар берілді.