Іс тетігін дайындық шешеді
Қызылорда-Семей бағытындағы №22 пойыздың вагонында тырысқақ ауруын «жұқтырған» жолаушы анықталды. «Сырқаттың» жағдайын білген жолсерік дереу пойыз бастығына, олар өз кезегінде алдағы станция диспетчеріне қоңырау шалады...
Жолаушылар қауіпсіздігі үшін өткен профилактикалық шара осылай басталды. Арада санаулы минуттар өткенде қоғамдық денсаулық сақтау басқармасының мамандары мен күштік құрылымдар теміржол бекетінің басында науқасты күтіп алуға сақадай сай тұрды. Бұл шараға тартылған желілік полиция мен әскерилендірілген күзет қызметі шартты түрдегі сырқат отырған вагон аумағын қоршауға алып, жедел жеткен «жедел жәрдем» қызметкерлері шұғыл іске кірісті. Дәрігерлер вагон ішін және сыртын залалсыздандырып, науқасты дереу ауруханаға алып кетті.
Осылайша оқу-жаттығу жұмыстары жоғары деңгейде ұйымдастырылып, мамандар мен теміржолшылар кез келген індеттің алдын алуға даярлықтарын тағы бір мәрте пысықтады.
– Қоғамдық денсаулық сақтау басқармасының басты міндеті – жолаушы пойыздарында, темір жол бекетінде жолаушылар қауіпсіздігін сақтау, кенеттен кезіккен індет пен сырқатқа уақыт оздырмай көмек көрсету және де оқужаттығу жұмыстары арқылы тосын жайтқа төтеп берудегі дайындық деңгейін көрсету. Себебі, көп жағдайда іс тетігін дайындық шешетінін практикада көріп жүрміз, – дейді Семей бөлімшелік көліктегі қоғамдық денсаулық сақтау басқармасының жетекші маманы Марзия Ақшалова.