Нұсқаулықты білу шарт

«ҚТЖ-Жүк тасымалы» АҚ-ның эксплуатациялық жұмыстар бойынша атқарушы директорының міндетін атқарушы Н.Келбұғанов ағымдағы жылдың бірінші жартыжылдығына бекіткен ұйымдастырушылық шаралар жоспарын орындау бойынша жұмыстарды қорытындылады.

Пойыз құрастырушылардың қозғалыс қауіпсіздігі мен еңбек қорғауды қамтамасыз етудегі жауапкершілігін арттырып, білімдерін жетілдіру мақсатында бірқатар шаралар атқарылды. Атап айтқанда, барлық жұмыс орындарында «Пойыз құрастырушы, сен – маневр жетекшісісің!» деген тақырыпта ақпараттық парақшалар ілінді, сонымен қатар осы салаға қатысы бар 100 қызметкерге техникалық сабақтар өткізілді. Ауызша сұрау арқылы техникалық пайдалану ережелері, белгі беру бойынша нұсқаулық, пойыздар қозғалысы бойынша нұсқаулықтарды үздік білетіндердің байқауы ұйымдастырылған. Нәтижесінде олардың арасындағы ең білімділерге станция атынан грамоталар табысталды.

Мәселен, Маңғыстау станциясы бойынша 1 орын пойыз құрастырушы Бекмырза Қожаевқа, екінші орын Алтынбек Таласовқа, үшінші орын Алтынбек Набиевке берілді. Ал Бейнеу станциясында Мақсат Жарылғасынов ең үздік құрастырушылар қатарынан көрінді.

– Пойыз қозғалысымен жұмысын байланыстырған әрбір теміржолшы өз міндеттерінің бірі ретінде осы техникалық пайдалану ережелерін сақтауды санайды. ТПЕ-ні орындау темір жол көлігінің барлық бөлімдерінің ұйымшыл жұмысын, қозғалыс қауіпсіздігі мен темір жолдың тоқтаусыз және нақты жұмысын қамтамасыз етеді. Сондықтан нұсқаулықты білу шарт – дейді пойыз құрастырушы Бекмырза Қожаев.