Шетпеде күрделі жөндеу жұмыстары жүруде
Маңғыстауда Шетпе станциясы мен 14-бекет аралығындағы басты жолға күрделі жөндеу жұмыстары жүруде.
Бүгінгі таңда жоспарланған көлемнің шамамен 70 пайызы орындалған. Мұндай жөндеу жұмыстарын жүргізу үшін пойыздар қозғалысында күндізгі уақытта үзіліс керек. «Толаскез» жарияланған тұста ғана жол шаруашылығы мамандары жөндеу жұмыстарына кірісе алады. Шетпе мен 14-бекет аралығындағы 16 км 661 метр темір жолға күрделі жөндеуді «Темір жол жөндеу» ЖШС-нің Ақтөбе ПМС мекемесі жасауда. Мекеме директоры Сергей Нұрбергеновтің айтуынша, осы жолдың бүгінгі таңда 15 км 240 метр бөлігіне жөндеу жүргізілген.
– Жол жаңартуға қиыршық тас Ақтөбенің Біршоғыр станциясынан алынып жатса, ұзындығы біртұтас 725 метр болатын рельс бунақтары Ақтөбе рельс арқалық зауытынан әкелініп салынуда. Ескі жолдың ағаш бетондары темір бетон түріне ауыстырылып жатыр. Әрине мұның бәрі пойыз қозғалысы жылдамдығын біршама арттыруға септік етері сөзсіз, – дейді Сергей Нұрбергенов.
Салынып болған жолдарды Ірілендірілген Маңғыстау жол дистанциясының қызметкерлері қабылдап алуда. Вахталық әдіспен Ақтөбеден қатынап жасайтын мекеме мамандары бұдан кейін Ақтөбе облысының аумағындағы Тамды – Ақкемер және Құдық – Жем арасындағы жолдарға күрделі жөндеу жүргізбек. Жалпы биылдыққа мердігер мекеме осы жолдардың бәрін қосқанда 41 км 396 м жолды толықтай жаңартқалы отыр.