Белкөл станциясы: ерекше бекет
Белкөл станциясы – Қызылорда ЖТ бөлімшесінде орны ерекше бекет. Қала іргесіне жақын орналасқандықтан станцияның жұмысы қауырт. Төрт ауысыммен жұмыс істейтін белкөлдік теміржолшылар үздік ұжым қатарынан. Бекетті өткен жылы жарияланған Станция бастығы жылы байқауының жеңімпаздары қатарынан көрінген үздік басшы Мақсат Жүсіпов басқарады.
Белкөлдік теміржолшылар биыл да межелі міндеттерді мінсіз орындауға білек сыбана кірісіп отыр. Алғашқы нәтижелері көңілге қонымды. Айталық, биыл сәуір айында станциядан 1353 вагонға 75768 тонна жүк тиеліп, бұл өткен жылдың сәйкес мерзіміндегі 1125 вагонға 63000 тонна жүк тиеу көрсеткішінен әлдеқайда басым шықты. Тиелген жүктерді жіктеп таратсақ, онда 80 вагонға 3724 тонна мұнай, 34 вагонға 987 тонналық газ, 31 вагонға 1911 тонна мазут, 3 вагонға 103 тонна көлемінде химиялық сода секілді өндірістік жүктер артылған. Ал төрт ай ішінде атқарылған жұмыстарды сараптайтын болсақ, онда бекет теміржолшыларының адымы алшақ. Мәселен, бекет ұжымы өткен жылы 2458 вагонды 137648 тонна жүкпен толтырып жөнелтсе, биылғы төрт айда 2552 вагонға 143663 тонна жүк тиепті. Ұжымның жүк түсірілімі көрсеткіші де көтеріңкі. Мәселен, сәуір айында 644 вагон – 36064 тонна, ал төрт ай ішінде 1199 вагон 67895 тонна жүктен босатылған. Сонымен қатар статистикалық жүктеме, бір жүк операциясы кезіндегі вагонның бос тұруы сияқты көрсеткіштер де ұтымды орындалған.
Станция қызметкерлерінің жұмысты ұтымды ұйымдастыруы, еңбек тәртібін сақтауы, техникалық сабақтарға толықтай қатысуы бекет басшылығы тарапынан қатаң қадағалауға алынған.
– Станция бастығы ретінде ұжым теміржолшыларының жұмысын бақылап, қадағалау – кәсіби міндетіміз. Теміржолшылар ауысым алдында пысықтау инструктажынан өтеді, қала берді мен және орынбасарларым күндіз және түнде кенеттен жоспарланбаған тексеру өткіземіз. Сәуір айында өткізілген 4 тексеру кезінде 1 ескерту беріліп, тиісті хаттама толтырылды, сол жерде нұсқаулық өткіздік. Бұдан бөлек әр апта сайын қауіпсіздік күні өтеді. Онда тосыннан болуы ықтимал жағдайлардың алдын алу шаралары жасалады. Жалпы мұның барлығы бекет теміржолшыларының амандығы үшін, өндірістік жұмыс тәртібінің сақталуын қадағалау үшін жасалады. Осындай іс-шаралардың нәтижесінде жыл басынан бері пойыздық және маневрлік жұмыстар кезінде ПҚҚ-ның бұзылуына жол берілген жоқ, станциялық және кірме жолдарда тосын жағдай орын алған жоқ, – деп жұмыс тынысымен бөлісті Белкөл станциясының бастығы Мақсат Жүсіпов.