Күрделі жөндеу жылдамдықты арттырады
Биыл Маңғыстау магистральдық желісі бойынша 56,6 шақырым жол күрделі жөндеуден және 21 шақырым жолға ескі жарамды материалдарды пайдалана отырып, орташа күшейтілген жөндеуден өтеді деп жоспарлануда.
Қазіргі таңда 15,2 шақырым күрделі жөндеу жүргізіліп, 14 бекет – Шетпе аралығын маусым айының ортасында аяқтау жоспарланып отыр. Күрделі жөндеу барысында ағаш шпалдардың орнын темірбетонды шпалдар ауыстырмақ. Жол саласы мамандары, темірбетонды шпалдардың қызмет көрсету мерзімі ағаш шпалға қарағанда 3-4 есе жоғары әрі экологиялық таза болып келетінін айтып отыр. Түйіспесіз жолдың буынды жолдан ерекшелігі, түйіспелерге жұмсалған бекітпелер үнемді болады, қоршаған ортаға деген шу азаяды. Жалпы күрделі жөндеуді жүргізудегі мақсат – жаңа материалдарды төсеу есебінен жол жағдайын жақсартып, жылдамдықты жоғарылату. Айта кететін жайт, өткен жылы 3 аралықта күрделі жөндеу жасалып, пойыздар жылдамдығы 60шқ/ сағаттан 100 шқ/сағатқа дейін көтерілді.
Маңғыстау магистральдық желі бөлімшесіне қарасты ұзындығы 115 шақырымды құрайтын жолдың бір бөлігі Өзбекстанмен, екінші бөлігі Түркіменстан сияқты шет елдер шекарасымен түйіседі. Ағымдағы жылдың бес айында бөлімше бойынша пойыздардың қозғалыс қауіпсіздігіне нұқсан келтірген жағдай тіркелмеген. ПС-058 жол өлшегіш вагонының бақылау тексерісі қорытындысы бойынша жол күтімі бөлімшеде 51 бірлікке орындалып, жоспар 130 пайызды құраған. Бес ай ішінде МКТ, ПРСМ секілді ауыр жол машиналары жұмыс істеп, жоспарлы міндеттерді мінсіз орындаған. Қазір өңірде күннің ысуына байланысты рельстік бунақтарда температуралық кернеуді ретке келтіру жұмыстары жүргізілуде.
Еске сала кетсек, 2018 жылдың қорытындысы бойынша магистральдық желі бөлімшелері арасынан Маңғыстау магистральдық желі бөлімшесі үздік деп танылып, 1 орынға ие болған еді. Биыл да бөлімше ұжымы осы нәтиже үдесінен шығуға барын салып бағуда. Бөлімше еңбеккерлерінің ұстанымы – ұйымшылдық. Ауызбіршілік бар жерде жақсы нәтиже ауылы да алыс емес дейді олар.