Ақтөбе – Жіңішке телімінде ағымдық жөндеудің артықшылығы

Қазір Ақтөбе – Жіңішке телімі аумағында жолды ағымдық күтіп ұстауға бағытталған жөндеу жұмыстары қызу жүріп жатыр. Рельстер, бағыттама бұрмалары, темір жолдардың қиылыстары мен өтпелердегі ақаулар жойылып, техникалық талаптың сақталуы бақылауға алынған.

Ақтөбе – Жіңішке телімінде ағымдық жөндеу жұмыстарын жүргізу үшін жол алты сағаттық толаскезге жабылыпты. Біз барғанда рельс дәнекерлеуші жол машинасы ақаулы рельстерді дәнекерлеп, қайта қалпына келтіру шаруаларын атқарып жатыр екен. Жоспар бойынша 400 бағыттама бұрманы қалпына келтіру межеленген. «Бұл жұмыстар Ақтөбе – Қандыағаш және Ақтөбе-Жайсаң екі учаскесінде атқарылуда. Жол шаруашылығы мамандары бұл жұмыстардың басын қайтаруға 4-6 сағаттық техникалық үзілістер алып отыр. Ағымдық жөндеудің өз артықшылығы бар. Бұл жөндеу түрі жыл он екі ай жүргізіледі және пойыздардың қауіпсіз жүріп тұруы оның сапалы атқарылуына байланысты болмақ. Сондықтан жұмыс толық аяқталған кезде ғана пойыздың жүруіне рұқсат етіледі», – дейді Ақтөбе жол дистанциясы бастығының орынбасары Дархан Орынбаев.

Оның айтуынша, өңірде дәнекерлеуге бағытталған жөндеу жұмыстары сәуір айында басталыпты. Жолды ағымдағы күтіп ұстау ісі жыл он екі ай бойына жүргізіледі. Ақаулардың пайда болу себебін зерттеу және алдын алуды атқару істері жөндеу жұмысы кезінде сарапталып жатыр.

«Екі бригадир мен жол шеберін қосқанда 15 адам жұмыс жасап жатыр. Бұл бөлікте жоспар бойынша 3 шақырым бар. 1783 белгідегі – 4, 1784 белгідегі – 1, 1785 белгіде 4 ақауды қайта қалпына келтіреміз. Арнайы бұйрықпен берілетін «РМ», «МОК», «МКТ» техникаларымен алдағы уақытта жөндеу жұмыстары толық бітеді. Теміржолды техникалық пайдалану және қозғалыс қауіпсіздігіне жөндеу жұмыстарының алдында талдау жұмыстары жүргізіледі. Жер төсемінің кемшіліктері мен өзгерістерін жойғанда ғана пойыздардың қозғалыс қауіпсіздігін қамтамасыз ете аламыз», – дейді жол дистанциясының мамандары.

Мамандар өткен жылы ел аумағында болған төтенше жағдайдың үлкен сабақ болғанын, сондықтан жол жөндеу жұмыстары кезінде сапаға аса мән беріліп отырғанын жасырмады.

«Өткен жылы елімізде жолаушылар пойызымен болған төтенше жағдайдан кейін жөндеу жұмыстарының сапасы Ұлттық компания басшылығы және жол шаруашылығына жауапты мамандар тарапынан қатаң бақылауға алынды. Әрине, бұрын да өз жұмысымызға жауапкершілікпен қарайтынбыз. Ал қазір тәртіп күшейтілді. Апатқа қарсы бақылау жұмыстары екі еселенді. Айтпауға болмайтын бір мәселе бар. Ол жұмыс күшінің жетіспеушілігі бар. Штаттағы жұмысшылар саны азайды. Жұмыс көлемі көп, ал адам саны аз болып тұр. Кейде жол жұмыстарына қажетті құрал-жабдықтардың жетіспеушілігі де жұмысты қиындата түседі. Жыл сайын қажетті құралдар алынып тұрады, бірақ сапасының нашарлығынан тез істен шығып жатады. Әсіресе, жол кілттері мен балғалар қат», – дейді Дархан Орынбаев.

Ел экономикасы үшін теміржол көлігінің маңызды екені есепке алынып, саланы одан әрі дамыту бойынша жүйелі жұмыстар атқарылып келеді. Ол – 2020 жылға дейін Қазақстанның көлік инфрақұрылым жүйесін интеграциялау жұмысы. Бүгінде бұл шаруа даму бағдарламасының негізіне айналып отыр.