Маңғыстау-Ақтөбе пойызының жолсеріктері билетсіз жолаушыларды тиеп алды: қызметтік тексеріс өткізіледі

Кеше «Жолаушылар тасымалы» АҚ өкілдерінің қатысуымен 309/310 Маңғыстау – Ақтөбе бағытында жүретін жолаушылар пойызындағы 32-ші вагонда билетсіз жолаушыларды тамбурға дейін орналастырып, тасымалдауына байланысты журналистерге арналған брифинг өтті.

«Әлеуметтік желілерде 309/310 Маңғыстау – Ақтөбе бағытында жүретін жолаушылар пойызындағы 32-ші вагонға билетсіз жолаушыларды тамбурға дейін тиеп алғанын түсірген бейнеролик таралған болатын.

Ең бірінші кезекте біз осы бейнероликті түсіріп, берік азаматтық ұстаным танытқан жолаушы азаматқа алғысымызды білдіреміз. Бұл фактіні компания растайды. Қызметтік тексеріс өткізіледі. Қызметтік тексерістің қорытындысы бойынша жауапты жолсеріктер мен басшылары әкімшілік жауапқа тартылады. Ол сөгіс, қатаң сөгіс, сонымен қатар еңбек келісімшартын бұзуға дейін барады. Осы сияқты бейнероликтерді біздің коммуникацияның басқа каналдары арқылы да алып жатамыз, «Жолаушылар тасымалы» АҚ басқарма төрағасы блогына да келіп жатады.

Еске сала кетсек, «Жолаушылар тасымалы» АҚ теміржолда билетсіз жүру және заңды түрде рәсімделмеген жүкті тасымалдау әрекеттеріне тосқауыл қою мақсатында 2018 жылдың сәуір айында «нөлдік» төзімділік принципін енгізген болатын. Яғни, бұл принципке сай заңсыз әрекетке бой алдырған Компания қызметкерлеріне қатаң жаза қолданылады. Ол – қызметкермен еңбек шартының бұзылуы. Айталық, сол уақыттан бері 130-дан астам қызметкермен еңбек шарты бұзылып, 30-ға жуық адамның мансаптық қызметі төмендетілді. Сонымен қатар мұндай заңсыз әрекеттерге жол бермеу, болдырмау мақсатында Компания пойыздарды тексеріп тұрады. Компанияда онымен айналысатын сапаны бақылау қызметі бар. Ай сайын 500-ден астам пойыз тексеріледі. Үстіміздегі жылдың бес айында 3000-ға жуық пойыз тексеріліп, билетсіз жолаушыға қатысты 79 факті және 1,5 тонна рәсімделмеген жүк багажы анықталды. Кінәлі мамандар жазасын алды. Мұндай тексеру жұмыстары мемлекеттік орган тарапынан да жүргізіліп тұрады. Сондайақ, мұндай шараны жүзеге асыруға былтырдан бастап жемқорлықпен күрес агенттігі де қосылып отыр», – деп ақпарат берді Сервис және клиенттермен жұмыс жөніндегі департамент директоры Әлібек Сұлтанов.

Оның айтуынша, жолаушы жолда көңілінен шықпайтын фактілерге тап болып жатса, яғни жағымсыз иіс, лас дәліз, әжетхана бөлмесінде судың тапшылығы, жыртық немесе кір төсек-орын және тағы басқа жағдайлар болса, міндетті түрде жолсерікке немесе пойыз басшысына шағымдана алады. Жолаушының талабы бойынша жолсерік міндетті түрде шағым кітапшасын ұсынуы тиіс. Не болмаса фотобейне түсіріп, 1433 бірыңғай қызмет орталығына немесе Компанияның ресми сайтындағы Бас директордың блогына (http://www.temirzholy. kz/blog-predsedatelya-pravleniya/) жазып жіберуіне, сонымен қатар әлеуметтік желілердегі (Facebook, Vkonakte) біздің парақшаларымызға өтінім қалдыра алады.

«Жолаушылар тасымалы» АҚ қашан да өз жолаушыларына жолда көрсетілетін қызметтің, сервистің жоғары деңгейде болуын қадағалап, сапар барысында баршаға қолайлы жағдай жасауға атсалысып отыр.