Пойыздарда билетсіз жолаушы жойыла ма?
Ақтөбе облысы бойынша меншікті тілші
1 шілдеден бастап «Қазақстан темір жолы» ҰК» АҚ қарасты барша бағыттардағы пойыздарға электронды жол жүру билеттері жаңа автоматтандырылған жүйе арқылы сатылатын болады. Бұл пойыздарда билетсіз жолаушының болмауына және сыбайлас жемқорлыққа жол бермеу жұмыстары үшін тиімді болғалы тұр.
Жуырда «Жолаушылар тасымалы» АҚ-ның «Батыс» жолаушылар тасымалы жөніндегі аймақтық филиалы Мемлекеттік қызмет істері агенттігі өкілдерімен бірлесе жолаушы пойыздарына рейд жұмыстарын жүргізді. Жолаушылар тасымалы қызметінің мамандары пойызға мінуді жылап тұрып сұрайтын жолаушылардың кесірінен жолсеріктер мен пойыз басшыларының жұмысына қиындық туатынын жасырмайды.
«Билетсіз жолаушыға қатысты тек жолсерік жазаланбау керек деген мәселені көтеріп келеміз. Шетелде билет алмай пойызға мінген жолаушылар да әкімшілік жауапқа тартылады. Бұл мәселе сол кезде түбегейлі тоқтайды деп ойлаймын. Вагонға жауапты адамдарды жиі жазалағандықтан пойыз басшылары зардап шегуде, соңғы кезде жолсеріктер ол қызметке барғысы келмейді. Себебі вагонға мінгізуді жалынып сұрағандардың (біре уі жаназаға бара жатады, біреуі тойға дегендей...) көңілін қимай, тәуекелге бел буып алады. Кейбіреулер қатты қиналып тұрғандарын айтып жылап жібереді. Осындай жағдайда жолаушыны вагонға мінгізіп, кейін жолсеріктің өзі жұмыстан шығып кеткен оқиғалар жеткілікті», – дейді «Батыс» жолаушылар тасымалы жөніндегі аймақтық филиал директоры Дархан Ұбайдуллаев.
Мемлекеттік қызмет істері агенттігінің өкілдерімен бірлескен жұмыстар нәтижесінде пойыз жолаушыларының арасында билет сатылымына қатысты қиындық болмайды деп сендіреді. «2019 жылдың 1 шілдесінен бастап теміржол компаниясына қарасты барлық бағыттарға электронды жол жүру билеттері жаңа форматта енгізіледі. Онда қайтарылған билеттер де белгіленген уақытта сатылымға шығатын болады», – дейді Мемлекеттік қызмет істері агенттігінің өкілі.
Сонымен қатар, мамандар жолаушылар жиі шағымданатын жайт, вагондарда тұрған теледидарлардың не себепті жұмыс жасамайтынын да түсіндіріп кетті.
«Жолаушылар фирмалық пойыздарда теледидар мониторларының жұмыс жасамай тұратынына шағым айтады. Себебі, лицензия алу өте қымбат. «Жолаушылар тасымалы» АҚ – барлық бұқаралық әлеуметтік тасымалмен айналысатын компаниялар секілді басы артық қаржысы жоқ, шығынмен жұмыс жасап отырған компания. Қазір әншілер әндерін пойыз ішінде қойғаны үшін миллиондаған ақша сұрайды. 2014 жылдары 5-10 миллиондап айыппұл төледік. Сол үшін де қазір телеэкрандармен бейнебаян көрсетуге тыйым салдық», – дейді Дархан Ұбайдуллаев.
Жолаушы тасымалы – қашан да дау-дамайы көп қиын сала. Электронды жол жүру билеттері жаңа автоматтандырылған жүйеге көшірілуі қаншалықты тиімді болмақ, Мемлекеттік қызмет істері агенттігі өкілдері айтқандай, билетсіз жолаушы жойыла ма, жоқ па, оны да алдағы уақыт көрсетеді.