Теміржолшылар білім жетілдіру орталықтарында білім деңгейін көтерді
Қызылорда облысы бойынша меншікті тілші
Аймақ теміржолшыларының жалпы сала бойынша білім-білігін жетілдіру үшін арнайы бағдарламалар түзіліп жолға қойылған. Осы бағдарлама негізінде бөлімшеге қарасты сала мекемелерінің теміржолшылары теориялық білім жетілдіру орындарында болып, білімдерін көтеріп, өндіріске тың серпінмен қосылып отыруы дәстүрге айналған.
Мысалы, Қызылорда магистральдық желі бөлімшесі бойынша ағымдағы жылдың алты айында 415 теміржолшы еліміздің салалық білім жетілдіру орталықтарында теориялық және практикалық білім деңгейін көтеріп, шеберліктерін шыңдаған екен. Бұл жайында бөлімшенің кадр бөлімі басшысы Айдана Нұрмашқызы мәлімдеді.
– Бөлімше теміржолшыларының білімін жетілдіру соңғы жылдары өте белсенді жүргізілуде. Жұмысшықызметкерлердің елміздегі арнайы орталықтарында болып білім нәрімен сусындап, жаңа технологияларды игеруіне аса көңіл бөлініп отыр. Соның арқасында технологиялық жаңалықтарды игеру де белсенді жүріп жатыр. Биылғы алты айда бөлімше бойынша 415 теміржолшы Ақтөбе, Нұрсұлтан және Тараз қалаларындағы білім жетілдіру орталықтарында білімін жетілдіріп өндіріске оралды, жыл бойы осы үрдіспен жүргізіледі. Сонымен қатар, биыл Өрт сөндіру пойызы (Норпож) саласынан да бірнеше маман Қызылорда қаласында білім жетілдіру курстарынан өтті, – дейді кадр бөлімінің басшысы Айдана Нұрмашқызы.
Ал бөлімшенің өзінде өткізілетін әртүрлі тақырыптағы семинарлар, күнделікті мамандар тарапынан жүргізілетін техникалық сабақтар, пысықтау инструктаждары, күндізгі және түнгі мезгілде тосын бақылау жұмыстары бар – бәрі айналып келгенде теміржолшылардың кәсіби міндетін мінсіз атқарып, пойыздардың қозғалыс қауіпсіздігін сақтауды арттыруына негізделген.