Атырауда көрсеткіштерді үздік орындағаны үшін сыйақы төленді

«ҚТЖ-Жүк тасымалы» АҚ бас директоры Кайрат Сәуірбаевтың 2019 жылғы 24 маусымдағы №110ГП бұйрығымен Атырау жүк тасымалы бөлімшесіне биылғы жылдың бірінші тоқсанының қорытындысына сәйкес, салалық жарыс бойынша бекітілген көрсеткіштерді үздік орындағаны үшін сыйақы төленді.

Яғни, бөлімшенің әрбір қызметкеріне деген сыйақы көлемі 15152 теңгені құрады. Атырау жүк тасымалы бөлімшесі бойынша мұндай сыйақыны барлығы 2693 жұмысшы алды. Олардың барлығы – өндіріспен тікелей қатысты, қозғалыс қауіпсіздігін қамтамасыз етіп, тасымал тасқынын арттыруға өз үлесін қосқан теміржолшылар. Сыйақының жалпы сомасы 38 млн 629 мың теңгені құрап, бүгінде барлық жұмысшылардың қолына тиді.

Еске сала кетсек, Атырау жүк тасымалы бөлімшесі бойынша биылғы жылдың бірінші тоқсанында техникалық жоспарға сай барлық 16 көрсеткіш 100 пайыздан аса орындалған болатын. Яғни, пайдаланым жүк айналымы 2317,9 млн.ткмнетто болып, 106,5% құрады. Жүк тиеу көлемі 2414,5 мың тонна болып, орындалуы 101,4% болды. Пайдаланым жүк айналымымен қоса, жүк вагонының айналымы – 102,2, жергілікті вагон айналымы – 102,3, ал жүк вагонының өнімділігі – 104,8%, вагонның орташа тәуліктік жүрісі – 101,8%, вагонның статистикалық салмағы – 101,3%, бір жүк операциясына вагонның тұруы 103% болып, аймақта жүк тасымалы көлемінің осы тоқсанда жоғарылағанын көрсетті. Пойыздың орташа салмағы 3986 тоннабруттоны құрады, яғни, 101,4% болды. Локомотив жүрісі 102,4%, пойыздың учаскелік жылдамдығы – 106,4%, пойыздар қозғалысының техникалық жылдамдығы 104,9% болып орындалды.

Міне, еңбектегі осындай жетістігі үшін бөлімше алдыңғы лектен көрініп, теміржолшылар сыйақыға ие болды.