Кешенді ревизия қорытындысы
Маңғыстау ЖТ бөлімшесі – жылдам дамып жатқан бөлімше. Жан-жақты, яғни көлемі жағынан да, өндірісі жағынан да бүгінгі түбек темір жолын осыдан он жыл бұрынғы, ілуде бір пойыз қатынайтын тұйық жолмен салыстыруға да келмейді.
Себебі, Маңғыстау – бүгінде бірнеше бағытта тармақталған, трансконтиненталдық көлік дәліздеріне жол салған тоғыз жолдың торабы. Қазақстанды су көлігімен байланыстыратын Қаспий жағалауындағы қос айлақ – Ақтау мен Құрық теңіз порттары да осы түбекте. Сондықтан Қазақстан темір жолы тарапынан Маңғыстау темір жолына, оның өсіп-өркендеуі мен даму келешегіне ерекше назар аударылады.
Жуырда Маңғыстау ЖТ бөлімшесі бойынша жүргізілген кешенді ревизия да назар аудартып отыр. Оның нәтижелері «ҚТЖ-Жүк тасымалы» АҚ қозғалыс қауіпсіздігі департаменті директоры Жақсылық Жұматаевтың төрағалығымен өткен жиында кеңінен сөз боолды, қорытындысы жан-жақты айтылды.
Селекторлық отырыста ревизия барысында анықталған кемшіліктердің орнын толтыру шараларына желілік деңгейде барлық басшылар мен жұмысшылар тартылды, оларға нақты тапсырмалар берілді.
Тексеру нәтижесінде жетістіктермен қатар бірқатар кем-кетік те мәлім болды. Осы анықталған кемшіліктерге байланысты филиалда осы жылдың 20 шілдесі мен 20 тамызы аралығында «Қозғалыс қауіпсіздігіне ерекше назар» деп аталатын айлық өткізу жоспарланды. Соған байланысты айлық шараны ұйымдастыру және өткізу жұмыстарына орай 19.07.2019 ж. №309 бұйрық шығарылды.
Айта кетейік, Түбек теміржолында өткен кешенді тексеру комиссиясы құрамында тәжірибелі мамандар болды. Олардың қатарында, мысалы, Қанат Мұсабеков, Аманқос Нәдіров сынды менеджерлер, Батыс өңірі бойынша аймақтық ревизор Ерболат Ахметов, вагон шаруашылығы бойынша ревизорлар Дархан Биманов және Мадихан Есетов болды.