Станция кезекшісінің екі аяғы пойыз астында қалды
Ақтөбе облысы бойынша меншікті тілші
Оқыс оқиғадан теміржолшы зардап шекті. Қозғалып бара жатқан пойызға ұмтылған станция кезекшісінің екі аяғы пойыз астында қалды...
Оқиға 19 тамыз күні Ақтөбе облысының Шалқар станциясында болған. «Алматы-Ақтөбе» пойызының жөнелтілу сәтінде 33 жастағы станция кезекшісі қозғалып бара жатқан пойызға ұмтылған. Кезекші сол күні түнгі ауысымнан шыққан екен. Астана уақытымен сағат 9:56 мезгілінде №33 жолаушылар пойызы Шалқар станциясынан қозғалады. «Қазіргі уақытта осы оқиғаға қатысты тергеу жұмыстары жүріп жатыр. Құзырлы орындар жауап алуда. Сол себепті біз нақты ештеңе айта алмаймыз», – дейді Шалқар станциясының басшысы Жолдыбай Ізтілеуов.
Екі аяғынан айрылған станция кезекшісі Бұқарбаева Гүлжанат Төлегенқызы 1986 жылы туған, Қандыағаш станциясының кезекшісі, 2011 жылдан бастап теміржол саласында жұмыс жасайды. Шалқар қаласының тұрғыны. Отбасылы, үш баланың анасы.
Аудандық аурухананың дәрігерлері науқастың жағдайын бірқалыпты ауыр деп бағалап отыр. Келіншекке ота аудандық ауруханада сәтті жасалған.