Иесіз малдың жол бойына шығып кетпеуі үшін қоршау күшейтілген

Қызылорда ЖТ бөлімшесінің солтүстік шекарасындағы Сексеуіл жол дистанциясы бойынша жылдың сегіз айында тепловоз машинистері тарапынан 56 мәрте жедел тежегіш қолданылып, оның 9 жағдайында пойыз мал басып кеткен.

Бұл жайында Сексеуіл жол дистанциясының жол инженері Бауыржан Төлегенов мәлімет берді. Маманның айтуынша, иесіз малдың жол бойына шығып кетпеуі үшін дистанция бойынша Сексеуіл-Аралқұм телімі тегіс қоршалған. Ал дистанцияның жаңа жолы саналатын Сексеуіл-Қоскөл учаскесіндегі Абай станциясы мен 19-бекет арасына тікенекті сым тартылыпты. Дистанция бойынша 15 жол өтпесі болса, оның төртеуі тәулік бойы күзетіледі, пойыз сирек жүретіндіктен 11 жол өтпесінде күзет жоқ.

– Дистанция телімдерін қараусыз малдан оқшаулау үшін жолды жағалай қоршау жұмыстары қарқынды жүргізілуде. Негізгі күші Сексеуіл-Аралқұм теліміндегі қоршауды күшейтумен қатар, Сексеуіл-Қоскөл жаңа телімін малдан қорғауға жұмылдырылуда. Жыл басынан бергі жоспарланған 20 шақырымдық аумақты қоршау жұмыстары барысында жол жағалай 4090 дана қада қағылып, жаңадан 4 км қоршау тұрғызылды. Жыл соңына дейін жолды қоршау жұмыстарының жоспарын орындап, қараусыз малды жолға шығармаудың барлық амалдарын жасауға күш салып, жылжымалы құрамдардың телімдерден кідіріссіз өтуіне жағдай жасайтын боламыз, – дейді жол маманы Бауыржан Төлегенов.

Сексеуіл жол дистанциясының Сексеуіл-Қосқөл жаңа телімі арқылы «Қызылорда-Жезқазған-Нұр-Сұлтан» бағытындағы жолаушылар пойызы, «Сексеуіл-Қоскөл-Жезқазған» қаламаңы пойызы сағатына 80 км, ал жүк пойыздары 60 км жылдамдықпен жүргізілуі бекітілген. Бұл дегеніміз – қырағылықты күшейтіп, телімдегі пойыздардың қауіпсіздігін, бір қалыпты жүрісін ұдайы бақылауды, жергілікті тұрғындар тарапынан қозғалыс қауіпсіздігіне сыртқы ықпалдардан туатын мәселелерді жіті бақылап отыруды қажет етеді.