Қысқа дайындық: қамданған қапы қалмайды
Қызылорда облысы бойынша меншікті тілші
Қазіргі таңда аймақ теміржолшылары жаппай күзгі комиссиялық тексеру науқанына атсалысып, құжаттарын реттеп, құрал-сайманын сайлап отыр. Күзгі байқаумен қатар алдағы қатал қыстың қамына дайындық жайына да кірісіп кеткен.
Қыстың көзі қырауда байланыс құрылғыларының кідіріссіз жұмыс жасауын қамтамасыз ету үшін Қызылорда белгі беру және байланыс дистанциясында да қарбалас тіршілік күшейтіліп, дистанциялықтар тегіс дайындық шараларын қолға алған. Ұжым мүшелері өздеріне бекітілген телімдердегі құрылғыларды қайталап тексеруден өткізіп, кем-кетігін толықтырып, оңдайтынын оңдап, жөндейтінін жөндеп, жарамсызын ауыстырып, қысқа қамданысты қыздыра түсуде. Әрине бұл – «қыстың қамын жазда ойла» қағидасын ұстанатын аймақ теміржолшыларының жылдағы әдеті. Себебі кішкене бір кінәрат бола қалған жағдайда ол дистанцияның ғана емес, бүкіл бөлімшенің абыройына нұқсан келтіретін келеңсіздікке душар етпес үшін дистанциялықтар әзірлікті жан-жақты жүргізуге үйренген.
Бүгін дистанциялық теміржолшылардың бір тобы Қызылорда станциясының маңындағы байланыс құрылғыларын тексеріп, бақылау жұмыстарын жүргізуде екен. Жұмыс барысында бірнеше топқа бөлінген жұмысшылардың бір тобын станциялық жолдардың солтүстік алқымындағы құрылғылар маңынан жолықтырдық. Олар электромеханик Бауыржан Асқаровтың тобындағы электромеханиктер Орын тай Әбдіғали мен Серікбол Лепесов екен. Жол жиегіндегі бағдаршамдар мен байланыс құрылғыларының ескі бояуын қырып тазартып, жаңадан бояп жатқан олар, бұл да қысқа дайындық шаралары аясында бекітіліп берілген тапсырмалар қатарындағы жұмыс екенін жеткізді. Сол жұмыстарды топқа бөлініп атқаруда.
– Бүгінгі жұмысымыз СОБ құрылғыларының сырлы бояуын тазартып, жаңадан бояу жұмысын жасауда мыз. Тап қазір станцияның солтүстік алқымындағы 2-бағыттамалық бұрманың электрожетегінің, рельс маңы жол жәшіктерінің тетіктерін, бағдаршам тұғырларын бояп келеміз. Сонымен қатар байланыс құрылғыларында назарға ілінген кемшіліктер байқасақ,орнында жөндеу жұмыстарын атқарудамыз, әзірге ондай өрескел кемшілік байқалмады, – деді топ жетекшісі Бауыржан Асқаров.