Қайталанбауы тиіс
Жыл басынан бері Маңғыстаудың Бейнеу ауданына қарасты темір жолда 3 адамды пойыз қағып кету оқиғасы тіркелді. Оның бірі кісі өлімімен аяқталды. Жуырда оқушылармен кездескен теміржолшылар осы жөнінде әңгімелеп, теміржолда сақ болуға шақырды.
Кездесуді теміржолшылар мен Бейнеу ауылы әкімдігі бірлесе теміржолға жақын орналасқан Манашы орта мектебінде «Темір жол – қауіпті аймақ!» тақырыбымен ұйымдастырды. Оған ауыл әкімі С.Қалдығараевтан бастап, мектеп директоры К.Аманов, Бейнеу станциясының бас инженері Б.Тұраев, қауіпсіздік техникасы инженері Г.Мұхтарова қатысты. Мамандар оқушылар мен мұғалімдерге Бейнеу темір жол торабында пойыздың адам басу жағдайының себептеріне тоқталып, жол бойында жүру тәртібімен таныстырды. Жұмыстан жəне мектептен кері қайтқанда, мал айдағанда жол дистанциясының маңында орналасқан арнайы өтпеден өту, онда да маневрлік қозғалыстың жоқтығына көз жеткізіп, сақтық шараларына мән беруді ескертті. Азаматтардың жеке қауіпсіздік ережелерін білмеуі және бұзуы, сол сияқты жол бойында ойнау, үлкендердің ішімдік ішіп алып мас күйде жүруі де темір жолда жарақаттануға, тіпті өлім оқиғаларына алып келерін түсіндірді. «Темір жол – жоғары қауіпсіздік аймағы!» атты видеоролик көрсетіліп, теміржолда жүру талаптарын бұзғандарға ҚР ережелеріне сәйкес жаза қолданылатыны туралы жадынамалар таратылды.
Түсінік жұмыстарының соңында «Теміржол қауіпсіздігі» тақырыбында тәрбие сағаттарын өткізіп тұру туралы шешім қабылданды.
− Мұндай шаралар осымен тоқтап қалмайды. Алдағы уақытта да жоспарға сай жалғасады. Себебі үстіміздегі жылы тіркелген қайғылы оқиғалар қайталанбауы керек. Аталған жағдайдың бірі 14 наурызда орын алды, маневрлік жұмыс барысында Бейнеу ауылының тұрғынын пойыз қағып кетіп, нәтижесінде зардап шегуші оң қолынан айырылды. Тексеріс барысында азаматтың ішімдік ішкендігі анықталды. Ал 14 мамырда болған жайтта Қоркөл станциясында Есет ауылының тұрғыны темір жол бойынан мал айдап өтіп бара жатқанда жүк пойызының астына түсіп, көз жұмды. 6 қыркүйекте Бейнеу-№1 бекет аралығында Бейнеу ауылының тағы бір тұрғыны құлағындағы құлаққаппен темір жол бойынан мал айдаймын деп жүк пойызына қағылып, басынан жарақат алды. Сондықтан тағы да ескертетініміз, темір жолға жақын жүргенде, өте абай болу қажет. Кем дегенде 5 метр қашықтықта жүру керек. Пойыз екпінімен ұшырып жіберуі мүмкін, – дейді Бейнеу станциясының қозғалыс қауіпсіздігінің инженері Ғалым Қанатов.