Вагондар кідірісі азайған
Үстіміздегі жылдың тоғыз айында Балқаш станциясынан жоспарлы 7250 вагонның орнына 12160 вагонға жүк тиеліп, 167,7% межені бағындырған. Тоннаға шаққандағы көрсеткіш 218723 бірлікке артық орындалып, 173,2 % құраған.
Статистикалық жүктеменің де шамадан тыс орындалғаны байқалады. Ал, жүк тиелімінің вагонға шаққандағы көрсеткішінің өткен жылдың есепті мерзімімен салыстырғанда 2640 вагонға, 167656 тоннаға аз болып отыр екен. Мұны станция қызметкерлері күкірт қышқылы цехындағы пештің жөндеуге жабылуына байланысты жүк тиелімінің азайғанымен түсіндіріп отыр.
Жүк түсіріліміне келсек, жоспардың орындалуы биыл 103% құраса, өткен жылмен салыстырғанда 111% асып жығылған. Яғни, жыл басынан бергі тоғыз ай ішінде 68451 вагоннан жүк түсірілген. Көтеріңкі көрсеткіштерді жүк операцияларына вагондарды бергенге дейін жұмыссыз тұрған уақытынан, жүк операциялары кезінде және жөнелтуді күтіп тұрған уақыттарынан да көруге болады. Бұл жерде атап өтерлігі – уақыт көрсеткіштерінің едәуір қысқартылуы. Айталық, жергілікті вагонның кідірісі 8,14 сағатқа қысқарып, тапсырма 141% орындалған. Өткен жылмен салыстырғанда да бұл көрсеткіштің орындалуы 124% құраған. Жүк операциясы кезінде де вагонның тоқтап тұруы 8,53 сағатқа қысқарып, жоспар 144% орындалған.
Өңделмейтін транзиттік вагонның және өңдеуді қажет еткен транзиттік вагонның да аялдап тұру уақыты мейлінше қысқарып, жоспар көрсеткіштері 127 және 110%-терді құраған. Осы ретте, вагондар кідірісінің азаюы өз кезегінде вагон айналымының жақсаруына әкеліпті. Жоспардың орындалуы 110%. Әрине, жоспарлы тапсырмалардың тиянақты және межесінен асыра орындалуы бірінші кезекте станция қызметкерлерінің жұмысты ұтымды ұйымдастыра білуінен екені даусыз.