Ақтауда құрметті теміржолшы Қыдыр Қалағанов тұрған үйге ескерткіш тақта ілінді
Маңғыстау облысы бойынша меншікті тілші
Батыс өңірінің теміржолына өлшеусіз үлес қосқан теміржолшы құрметіне Ақтау қаласындағы өзі тұрған көпқабатты үйдің қабырғасына ескерткіш тақта ілінді. Құрметті теміржолшы Қалағанов Қыдыр Дәрменқұлұлы 1933 жылы Ақтөбе облысы Шалқар ауданында туған. Ақтөбе теміржол техникумын бітіріп, еңбек жолын 1957 жылы Шалқар станциясында таразышы болып бастапты. Екі жылдан кейін бөлімшеге коммерциялық ревизор, сосын пойыз диспетчері болып ауысады. Ташкент теміржол институтын бітіріп, жоғары білім алған соң бөлімше бойынша кезекші, 1967 жылы Ембі станциясының бастығы болады. Бірнеше жылдан кейін Ақтөбе бөлімшесі директорының жүк шаруашылығы жұмыстары бойынша орынбасары қызметіне тағайындалады. Маңғыстау өңіріндегі еңбек жолын 1987 жылы Гурьев теміржол бөлімшесі директорының Маңғыстаудағы орынбасары болып бастап, жиырма жыл түбек темір жолында жемісті еңбек етіп, зейнетке шыққан. Айта кетейік, кейіпкеріміздің әкесі Дәрменқұл Қалағанов «Ленин» орденді қазақтан шыққан алғашқы пойыз диспетчерінің бірі болған. Шалқар ауданында даңқты теміржолшы атында көше бар. Қалағановтар әулетінің еңбек жолын бүгінде үшінші буын жалғастырып жатыр.