Қалдықтарды сұрыптай білген маңғыстаулықтар экологиялық ахуалды жақсартуға үлес қосуда

Маңғыстау қосалқы бөлімшесінде тұрмыстық қалдықтарды бөліп төгу үдерісі жолға қойылғалы экологияға пайда келтіріп қана қоймай, мекеме бюджетіне де айтарлықтай кіріс кіргізіп отыр. Өткен тоғыз айда бөлімшеде қолданыстан шыққан қалдық заттарды тапсырудан түскен табыс 40 мың теңгеге жуықтаған. Мәселен, қазір бөлімшеде сағат, кондиционер, теледидар пульті, т.б. бұйымдардан шыққан ескі батареяларды тапсыру акциясы жүруде. Тамыздың басында басталған науқан аясында осыған дейін бірнеше кг батарея жиналған. Сондай-ақ, жыл басынан бері 466 кг қағаз, 22 кг пластмасса, 17 кг картон жинақталып, қоқысты кәдеге жаратушы орынға тапсырылған. Одан бөлек, оргтехника және шыны, басқа да қайта өңделетін қоқыстарды бөлек жинау жалғасуда. Бұл үшін бөлімше ғимаратына арнайы жәшіктер қойылып, оларды қабылдаушы арнайы мекемемен келісімшарт жасалған.

– Экологияға келтірілген зиян өзімізге төнетін қауіп деуге болады. Мысалы, полигонға тасталған бір батарея ауыр металдармен 20 метр топырақты немесе 400 литр суды ластауға қабілетті екен. Осыдан-ақ, күнде қоқысқа тастай салатын қарапайым батареяның зияны қандай екенін білуге болады. Сол үшін біздің қызметкерлер үйіндегілерді де алып келіп тапсырып жатыр, демек әркім экологиялық қауіпсіздікке үлес қосуда, – деген экология мәселелері бойынша жетекші инженер Ақкүміс Шәудірбаеваның айтуынша, бөлімше жыл басынан осы кезге дейін экология қауіпсіздігі бойынша айыппұл арқалаған жоқ.

Демек экологиялық қауіпсіздікті бұзу деректері, яғни қауіпті жүктердің төгілуі сияқты көрсеткіштер тіркелмеген.