«Нұрлы жол» вокзал кешені пойыздардың кешігетінін хабарлайтын мобильді қосымшаға қосылды

«Нұрлы жол» вокзал кешені пойыздардың кешіккенін Push-хабарлама арқылы әр жолаушы телефонына жеткізетін жаңа мобильді қосымшаға қосылды. Соның арқасында бұрын пойыздың кідіртілуін білмей қаламыз деп шағым айтатын жолаушылар саны азайған. Вокзал кешенініңтехнологиялық процесті ұйымдастыру бөлімінің менеджері Ертужан Құлыбаевтың айтуынша, бұл қосымша «Darmen» деп аталады. «I2NIK» компаниясы жасап шығарған жүйеге вокзалдар арасынан бірінші болып «Нұрлы жол» кешені тіркелген.

– Бізде пойыздардың кешігуі туралы хабарлама жіберуде қиындықтар көп болды. Ал әуежайда ұшақтың кешігуіне байланысты хабар жіберу бұрыннан жолға қойылған. Жолаушылар үнемі пойыздың кешігетінін өз уақытында хабарлап айтпайсыздар немесе мүлдем хабарлама жібермейсіздер деп шағым айтатын. Соған байланысты біз «Жолаушылар тасымалы» АҚ-на хат та жаздық. Бірақ бұл көп қаржы керек ететін, бюджетке енгізу жағы қиын шаруа болып шықты. Міне, ақыры біз нарықта сұранысы жоғары жаңа қосымшаның қызметін таптық. Аталған компаниямен ынтымақтастық туралы меморандумға қол қойдық. Бұл қосымша оған тіркеліп, жазылған адамдардың ұялы телефондарына лезде хабарлама жіберіп отырады. Ол үшін біз пойыздар жарты сағаттан көп кешігетін жағдайда Push-хабарлама, шаблондардың қазақша-орысша нұсқасын әзірледік. Оған вокзалдан бір адам бөліп, компьютерлік жүйе арқылы әлгі қосымшаға қалай жүктеуді, жіберіп отыруды үйреттік, – дейді бөлім менеджері.

Бір айта кетерлігі – вокзал бұл қызмет үшін мобильді қосымша жасаушы компанияға ақы төлемейді. Олар бастапқыда жарнама қағаздарын беріп, соларды вокзал ішіне, кіреберістерге ілуді тапсырған. Бүгінде осы қосымшаны жүктеп алған жолаушылар қай пойыз қанша минутқа кешігетінін алдын ала біліп отырады. Заманауи вокзалда пилоттық жоба ретінде енгізілген қосымшаға енді Қазақстанның барлық вокзалдарын қосу көзделуде. Ол үшін Магистральдық желі дирекциясы мен аталған қызмет көрсетуші компания арасында меморандумға қол қойылады. Қазір «Нұрлы жол» вокзалы бірінші болып жасаған дайын шаблондар мен Push-хабарламалар мәтіні өзге вокзалдарға таратылуда.