Маңғыстау қосалқы бөлімшесінің ұжымы Убайдулла Ермаковты зейнет демалысына шығарып салды
Маңғыстау облысы бойынша меншікті тілші
Маңғыстау станциясының тәжірибелі пойыз құрастырушысы Убайдулла Ермаковты әріптестері зейнет демалысына шығарып салды. Түбек теміржолына бір кісідей еңбегі сіңген теміржолшыны Маңғыстау қосалқы бөлімшесінің басшылығы да арнайы құттықтады. Убайдулла Абдурахманұлы 1995 жылдан бері табан аудармай Маңғыстау станциясында пойыз құрастырушы болып абыройлы еңбек етті. Осы жылдар ішінде қаншама жасты осы бір қиын да күрделі, кейде қауіпті кезде кәсіптің қыр-сырына үйретті. Сондықтан станцияда оны өзіне ұстаз санамайтын теміржолшы жоқтың қасы. Бөлімше бастығы Нәжімеден Ғұбашов бастаған топ Убайдулла Абдурахманұлының шаңырағына арнайы келіп, ардагердің иығына шапан жауып, естелік сыйлық табыс етті. Ұзақ жылғы адал еңбегіне алғыс айтып, ендігі жерде бейнетіңіздің тек зейнетін көріңіз деген ізгі тілектерін білдірді.
– 2008 жылы Маңғыстау станциясына пойыз құрастырушы болып келген күннен бастап ағамыздың қамқорлығын көп көрдім. Алғашқы жылдары көп нәрсені осы кісіден үйренгенім рас. Өз жұмысына жетік, тәжірибелі маман. Жастар келсе, ойланбай қамқорлығына алады, білгенін үйретіп, баулып, бірнеше жылда мынау деген маман етіп шығарады. Бұл кісі – бәріміздің ұстазымыз, – дейді кейіпкеріміздің шәкірттерінің бірі, Маңғыстау станциясы бастығының орынбасары Айбол Есмұханов.
Теміржолшылар отбасынан шыққан Убайдулла аға әке жолын қуыпты. Одан кем болмады. Ортасына сыйлы, артында ізі бар кәсіби теміржолшы атанды. Мадақ-марапаттан да кенде емес. Отбасында да жолы болған жан, жарымен екеуі екі баланы тәрбиелеп өсіріп жеткізген, бақытты әке, мейірімді ата.