Әйтеке би станциясындағы 6 балалы теміржолшы баспаналы болды
Ақтөбе облысы бойынша меншікті тілші
Әйтеке би станциясында машинист көмекшісі болып еңбек етіп жүрген Талғат Өмірзақов баспаналы болды. Көпбалалы әке мемлекеттік бағдарламамен ұзақ жыл баспана кезегінде тұрған. Үш бөлмелі пәтер кілтіне ие болған алты балалы әкенің қуанышында шек жоқ. Теміржолшыға ауданда жаңадан бой көтерген үш бөлмелі төрт үйдің бірі тиді. «Балаларымның несібесі» деп қуанған әке мемлекет қамқор- лығына дән риза. Алты балалы әке баспаналы болуды ұзақ жыл армандағанын айтады.
«Көп жылдар бойы кезекте тұрдық. Бәрінен балаларымыз қуанып жатыр, соларға жағдай жасағаны үшін мемлекетке рахмет. Көпбалалы, мұқтаж отбасылар баспаналы болсыншы. Балалар қиындықты көрмей, қуанып өссін. Біздің тұңғышымыз 11 жаста, кенжеміз ертең 2-ге толады. Ұлымыздың туған күніне осындай сыйлық болайын деп тұр», – деді қуанышымен бөліскен Талғат Өмірзақов.
Теміржолшы 2006 жылы ауданға келген қандастары- мыздың бірі екен. Сол жылы теміржол саласына жұмысқа тұрып, табан аудармай еңбектеніп келеді. Слесарь болып бастап, түрлі курстарда оқып білімін жетілдірген. 2011 жылдан бері машинист көмекшісі болып істейді.
«Теміржол саласы маған таңсық емес. Әкем теміржолшы, кеңес үкіметі кезінде осы Әйтеке би станциясында еңбек еткен. Мен де осы саладан алыстамадым. Нанымды теміржолдан тауып жүрмін. Осы ауданға келіп үйленген едім. Шүкір, қазір алты баланың әкесімін. Тәуелсіздіктің 30 жылдығына орай мұқтаж отбасыларға баспана беру бастамасы қатты қуантты. Әр шаңырақта той болсын!», – дейді теміржолшы жігіт.
Талғат Өмірзақов қазір машинистер курсында білім алып жүр. Мақсаты – осы кәсіптің «майын ішіп, жілігін шаққан» нағыз маманы болу.