Сыр елінде еңбек және тыл ардагері Тұрсынбай Садықовқа ескерткіш тақта орнатылды
Қызылорда облысы бойынша меншікті тілші
Өткеніне есеп беріп болашағын бағамдай білетін сыр жұртшылығы еңбек және тыл ардагері Тұрсынбай Садықовтың атын ұлықтап, майталман теміржолшы еңбек еткен бұрынғы Абыла бекетінің ғимаратына ескерткіш тақта орнатты. Облыс орталығынан жырақтағы бекетте саналы ғұмырын саланың дамуына арнап ерен еңбектің үлгісін көрсеткен Тұрсынбай ақсақал жайлы жиналғандар естеліктерін айтып, бұл шараның бекет тұрғындары үшін үлгі тұтарлық іс екенін атап өтті. 1912 жылы Қармақшы ауданынында дүниеге келген Тұрсынбай ақсақал теміржол саласында 1932 жылдан жұмыс істеген. Қара жұмыстан бастап бағыттамалық бұрма жұмысын меңгерген маман болады. Оның қабілеттілігін аңғарған басшылық Самарқанд қаласына теміржол техникумына оқуға жібереді. Арнайы мамандық алып келген соң Абыла бекетіне станция бастығы болып тағайындалады. Соғыс кезінде де броньмен теміржолда қалып, әскери жағдайға енгізілген салада жанқиярлықпен еңбек еткен аға ұрпақтың бірі. Еңбек жолында үлгілі теміржолшы атанып құрметке бөленді: «Ерен еңбегі үшін», «Еңбектегі ерлігі үшін», Ұлы Отан Соғысы Жеңісінің мерейтойлық медальдарымен марапатталды. Әкеміз өте еңбекқор, адал, шыншыл, өз ісіне шын берілген кісі еді. Өзі темірдей әскери тәртіппен өмір сүргендіктен біздерді – балаларын да осы тәртіпке бейімдеді, үйретті. Әлі есімде қақаған қыстың тас қараңғы түнінде жабық тұратын май шамды алып, пойыздарды күтіп алып, шығарып салып тұратын еді, – деп көзіне жас алды ақсақалдың қызы Райхан Тұрсынбайқызы. Ол кездегі теміржолдағы жұмыстың бәрі жалаң қолмен атқарылып, бекет басшылығына өте сенімді адам тағайындалатынын ескерсек, өмір бойы бекетке басшылық еткен Тұрсынбай ақсақалдың өз ісін өте жетік меңгерген маман, шебер ұйымдастырушы болғаны айтпаса да түсінікті.
– Ол кезеңдер теміржолдың өте ауыр да жауапты дәуірі болды. Қазір технология дамыған болса, ол кезде барлығы адамның қолымен, маңдай терімен атқарылды. Соғыс жылдарындағы жанқияр еңбек тіпті орасан болды. Соның бәріне төтеп беріп, бір бекеттің жұмысын жалғыз өзі атқарып тәулік бойы еңбек еткен Тұрсынбай ақсақал сынды аға буын ағаларымыздың ерлігін естен шығармай, тағзым ету бізге парыз,– деді тақтаның ашылу салтанатында сөз алған теміржолшы ардагерлер кеңесінің төрағасы Сисенбі Шермаханов.
Тұрсынбай ақсақалдың өнегелі жолын жалғастырып келе жатқан теміржолшылар әулетте баршылық екен.