Семейлік жас теміржолшылар донор болуға ынталы
Абай облысы бойынша меншікті тілші
Семей ЖТ бөлімшесі бойынша жастар ұйымының бастамасымен ел тәуелсіздігінің 30 жылдығына орай қайырымдылық шаралары жалғасуда. Жуырда бір топ теміржолшы жастар қалалық қан орталығына арнайы барып, донор ретінде қан тапсырды. Мұндай шаралар бұрын да ұйымдастырылып келді, биылғы артықшылық, қан тапсырғандар санының артуымен ғана ерекше болды және ынта білдірушілер қатарында жастар көп.
– Алдын ала жасалған хабарландыруға үн қосып, қан өткізуге ниет білдіргендер шынында биыл көп болып отыр. Жалпы, бөлімшемізде қалыптасқан ерікті «Теміржолшы донорлар» ұйымы бұл шараға әрдайым сергек қарайды. Сондықтан да болар, қан тапсыруға үзбей барып тұратын әріптестеріміздің қатары артуда. Бұл жолы біз – жастар белсенділік танытып, әрқайсымыз қалалық қан орталығына келіп 450 грамнан қан тапсырдық. Мүмкін, бір адамның болса да өмірін құтқарған шығармыз, – дейді бастамашыл топтың жетекшісі, Семей ЖТ бөлімшесінің жастар ұйымының төрайымы Арайлым Қосанова.
Жалпы Семей теміржолында қан тапсырып, қайырымдылық жасауда белсенді қызметкерлердің қатары көп. Бөлімшеде осы уақытқа дейін 40 реттен аса қан, 70 рет плазма өткізіп, 500 литрге жуық қан тапсырып, «Құрметті донор» төсбелгісін иеленген кең жүректі теміржолшы да еңбек етуде. Енді, міне, аға буын қалыптастырған сауапты да игілікті шараны жастар қауымы жалғастырып отыр.