Теміржол колледжінің студенті елордалық жастар мәслихатына депутаттыққа сайланды
Нұрсұлтан қаласындағы жоғары көлік және коммуникация колледжінің студенті Әлтайыр Ғалымжанұлы елордалық жастар мәслихатына депутаттыққа сайланды. Оған «Jas Otan» жастар қанаты ұйымдастырған саяси науқанда арнайы мандат табысталды.
Әлтайыр аталмыш колледжде «Тальго» дебат клубының президенті. Ол қоғамдық жұмыстарға белсенді араласып, түрлі байқауларға колледж атынан қатысып, талай рет бақ сынаған. «Әке көрген оқ жонар» демекші, Әлтайырдың теміржол саласының мамандарын даярлайтын оқуға келуіне әкесі ықпал еткен. Ғалымжан Болғанбаев «ҚТЖ-Жүк тасымалы» ЖШС филиалы Қызылорда бөлімшесіне қарасты Шорнақ станциясының қосалқы кезекшісі қызметін атқарады. Әлтайыр да келешекте теміржолшы мамандығының қыр-сырын меңгеріп, кәсіби маман болуды және мансаптық қызметте сатылап өсуді мақсат етіп отыр. Ал бұл арман-мақсатқа қол жтекізуге «ҚТЖ» ҰК»АҚ қабылдаған Жастар саясаты мол мүмкіндік береді.