Қазалы вагон пайдалану депосы мен кәсіподақ басшылығы ардагерлерге құрмет көрсетті
Қызылорда облысы бойынша меншікті тілші
Қазалы вагон пайдалану депосының бастығы Арғын Орымбаев пен ұжымның кәсіподақ ұйымының төрағасы Бақытжан Ибрайым бүгінде зейнет демалысындағы бір топ ардагерлердің шаңырағына арнайы барып, хал-жағдайларын білді.
Олар зейнетке кетсе де әрдайым депоның дамуына алаңдаушылық білдіріп, тілектес болып, ұжымның абыройы үшін тәлімгерлік тәрбиесімен көмектесетін ардагерлерге амандаса барып, иықтарына шапан жауып, құрмет көрсетті.
Вагон депосына отыз-қырық жыл еңбегі сіңген Ерқосай Қабылов, Нұрулда Орынбаев, Маргенбай Арықбаев, Ұзақбай Үсенбаевтың қай-қайсысы да кезінде ұжымның абыройын арттырып, табысын еселеуге өлшеусіз үлес қосқан аға буын. Өз кезеңінде депо басшының орынбасары, вагон қараушы-жөндеуші секілді түрлі салада жұмыс жасаған зейнеткерлер қазіргі деподағы жаңалықтар мен орын алып жатқан өзгерістерден үнемі хабардар болып, депо басшылығына өз ұсыныстарын айтып, пікірлесіп тұрады. Ұрпақтар сабақтастығы үзілмеген ұжымда кешегі және бүгінгі буынның бас қосуы дәстүрге айналған. Тек соңғы екі жылда елдегі пандемияға байланысты ондай мүмкіндік азайып кеткені де рас. Сондықтан депо басшысы мен кәсіподақ төрағасының арнайы келіп, сәлем беруін адагерлер де құп алып, қуана қауышты. Емен-жарқын әңгіме өрбітіп, пікір алмасып, соңғы жаңалық-өзгерістерден хабардар болған аға буын ізбасар інілеріне еңбекте табысты болуға тілек білдірді.