Ақтөбе вокзалында ұлттық киімдер жәрмеңкесі өтті
Ақтөбе облысы бойынша меншікті тілші
Ақтөбе теміржол вокзалы бір сәтке сұлулық алаңына айналғандай. Халықаралық әйелдер мерекесі құрметіне мұнда кеше қазақстандық дизайнерлердің қолынан шыққан жүзден аса сән үлгісі көрсетілген отандық өнімдердің жәрмеңкесі өтті.
«ҚТЖ-Жүк тасымалы» ЖШС-нің Батыс аймақтық филиалының қолдауымен өткен шара ел аумағында тұңғыш рет ұйымдастырылып отыр. Көктем мерекесі қарсаңында жолаушыларға ерекше көңіл күй сыйлаған шара отандық дизайнерлер жұмысын қолдауға да бағытталған. Жолаушылардың күту залын сән әлемінің салтанатты подиумына айналдырған жәрмеңкені тамашалаушылар да көп болды.
«Теміржолшылар қазақтың ұлттық өнерін, киім үлгісін қолдауға дайын. Оның үстіне эпидемиологиялық жағдайда еліміз жасыл аймаққа өтті. Көктем айы келді. Ұлттық ән мен ұлттық киім жолау- шыларға рух берері сөзсіз. Біз ақ жаулықты аналар мен барлық қыз-келіншектерді көктем мерекесімен құттықтаймыз», – дейді Ақтөбе вокзалының басшысы Тойбазар Қуанышев.
«Махаббатқа асығыңыз...» атты сән көрсетілімі жолаушыларға ерекше көңіл күй сыйлап, этно стиль, заманауи үлгідегі киімдер, сәукелелер мен сәнді киімдер көрсетілімі ұлттық әнмен әдемі астасып жатты...
«Ақтөбе темір жолы мен вокзал басшылығына алғысымыз шексіз. Шараны өткізуге бұл жер кездейсоқ таңдалмады. Сан мыңдаған жолаушылар ағылып жатқан вокзал қашан да қауышу мен табысу орны болған. Жолаушыларға сәтті сапар тілейміз», – дейді дизайнер Гүлнар Сахатова.
