Маңғыстаулықтар ежелден Амал мерекесін ерекше атап өтеді
Маңғыстау облысы бойынша меншікті тілші
Маңғыстау халқы ежелден Амал келді - жыл келді деп, 14 наурыз күнін ерекше атап өтеді. Көптен көрмеген ағайын туған көрісіп мәре-сәре болады. Жатсар үлкендерге сый-сияпатымен көрісе барып, батасын алады. Адамдар өкпе-назды ұмытып, бір бірімен төс қағыстырып, қайта арасын жақындатады. Бұл дәстүр түбек теміржолшылары да жылда жалғастырып келеді.
Биыл да бұл күні өңірдегі теміржол мекемелерінің қай қайсысына бас сұқсан камзол-кәжекейде құлпырған қыз келіншектер мен көрінісі баяғының батырлары мен ақсақал, хан, билерін еске салар ер азаматтардың ұлттық киімдегі келбетіне қарап көз тояды. Маңғыстау қосалқы бөлімінде де таңсәріден ұлттық әндермен домбыраның үні ғимараттың есігінен аттаған адамға бірден мерекелік көңіл күй сыйлады. Бөлімше бастығы Нәжімеден Ғұбашов пен Орталық теміржолшылар кәсіби одағының өңірдегі өкілі Әзірбай Тұрмағанбетов және басқа да бөлім басшылары бастаған жас үлкендерге көрісіп келіп жатты. Мәжіліс залға ұлттық дәмдер мен бауырсақ, ағарған қойылған дастархан жайылып, бәрі ауыз тиді.
Жиналғандарды бөлімше бастығы, кәсіподақ өкілі қыстан аман шығып, осындай көктем мерекесіне жетуімен құттықтады. Ел аман, бейбіт заман болсын деп ақ тілекті ағылтып, алдағы жұмыстарға сәттілік тіледі.
