«Нұрлы жол» вокзалындағы ісмер қыз-келіншектер арасында байқау өтті
«Қазақстан теміржолшысы» газетінің тілшісі
«Нұрлы жол» вокзал кешенінде жақында «Ал, қанекей, қыздар!» атты ерекше байқау өткізілді. Оған осы вокзалда еңбек ететін сұлу да сымбатты ғана емес, он саусағынан өнер тамған талантты қыздар қатысты, деп хабарлайды Rail-news.kz.
Арулар байқау шартына сәйкес өзара бақ сынасты. 4 ауысымнан шыққан кезекші қыздар шеберліктерін сынға салып, өнерлерін паш етті. Өнер болғанда да, негізгі талап қамыр илеу, оны жаю және кеспе етіп кесу болды. Яғни, бүгінгі таңда «дайын асқа тік қасық» болуды қалайтын, үй шаруасына олақ кейбір әйел заты үшін байқау есігі тарс жабылды деуге болады. Дегенмен ұлттық тамақ – ет асып, нанын жабуды бес саусақтай меңгерген ақылына көркі сай қыз-келіншектер де баршылық екен. Вокзал басшылығынан құралған қазылар алқасы сайыскерлердің қамыр илеу мен жаюдағы техникасын әділ бағалап, балл беріп отырды.
Сайыс нәтижесінде қамыр илеу мен жаюдың техникасын шебер меңгерген және шаштай етіп кеспе кескен Мадина Малгаздарова есімді өнерлі ару бас жүлдені жеңіп алды. Көзайым Каримова – 1-орын, Аяжан Жанұзақова – 2-орын, Лаура Букашева 3-орын алды. Жүлделеріне орай қыздарға 15-30 мың теңге аралығында сыйақы беріліп, өнерлеріне алғыс айтылды.