Семейдегі ардагер теміржолшылар ұлттық құндылықтырды дәріптеуде белсенді
Абай облысы бойынша меншікті тілші
Биылғы Наурыз мерекесі шығыстағы теміржолшылар үшін ерекше леппен өтуде. Әсіресе, зейнетке шықса да қоғамдық қызметтен қол үзбей жүрген ардагер теміржолшылардың белсенділігі жоғары болып тұр.
Бүгінде ақ кимешекті әже атанған бірқатар теміржолшылар жас буынды ұлттық салт-дәстүрге баулу, көпшілік арасында қазақтың ежелгі әдет-ғұрып түрлерін насихаттау бойынша тағылымды жұмыстар жүргізіп жүр. Салалық ардагерлер қауымы қаладағы түрлі ұйымдар, бірлестіктермен қосылып, түрлі іс-шараларға ұйытқы болуда. Мәселен, қазақтың ұлттық құндылықтарын насихаттайтын орталықтармен бірлесіп, түрлі қоғамдық шаралар ұйымдастыруда. Соның ішінде жас буын арасында ұлттық құндылықтарды насихаттау, қазақстандық патриотизмді қалыптастыру бойынша біршама жұмыс жасалған. Мәселен, осыған дейін қала көлемінде «Қымызмұрындық», «Ақ орамал», «Бауырсақ» сынды шаралар өткізілген болатын. Міне, осы ауқымды жұмыстардың қатарында биылғы жылы Наурызды мерекелеуге арналған түрлі тағылымды басқосуларға да ұйытқы болды.
Дәстүрлі «әжелер мектебінің» бүгінгі өкілдері арасында ұзақ жылдар бойы Семей вокзалының бастығы болған, қала бойынша қоғам белсендісі Нағима Мойынбаева, теміржол саласының ардагері Бижамал Қалиқызы, бұрма бағыттаушысы болған Тұрсынғайша Багенова, байырғы вагон шаруашылығының бүгінгі ардагері Күләш Құдайбердіқызы сынды ардагерлер қауымы бар.